wo dil hi kya tere milne ki jo dua na kare

vo dil hī kyā tire milne kī jo duā na kare

maiñ tujh ko bhuul ke zinda rahūñ ḳhudā na kare

rahegā saath tirā pyaar zindagī ban kar

ye aur baat mirī zindagī vafā na kare

ye Thiik hai nahīñ martā koī judā.ī meñ

ḳhudā kisī ko kisī se magar judā na kare

sunā hai us ko mohabbat duā.eñ detī hai

jo dil pe choT to khaa.e magar gila na kare

agar vafā pe bharosa rahe na duniyā ko

to koī shaḳhs mohabbat kā hausla na kare

bujhā diyā hai nasīboñ ne mere pyaar kā chāñd

koī diyā mirī palkoñ pe ab jalā na kare

zamāna dekh chukā hai parakh chukā hai ise

'qatīl' jaan se jaa.e par iltijā na kare

wo dil hi kya tere milne ki jo dua na kare

main tujh ko bhul ke zinda rahun KHuda na kare

rahega sath tera pyar zindagi ban kar

ye aur baat meri zindagi wafa na kare

ye Thik hai nahin marta koi judai mein

KHuda kisi ko kisi se magar juda na kare

suna hai us ko mohabbat duaen deti hai

jo dil pe choT to khae magar gila na kare

agar wafa pe bharosa rahe na duniya ko

to koi shaKHs mohabbat ka hausla na kare

bujha diya hai nasibon ne mere pyar ka chand

koi diya meri palkon pe ab jala na kare

zamana dekh chuka hai parakh chuka hai ise

'qatil' jaan se jae par iltija na kare