wo dil kahan hai ahl-e-nazar dil kahen jise

vo dil kahāñ hai ahl-e-nazar dil kaheñ jise

ya.anī niyāz-e-ishq ke qābil kaheñ jise

zanjīr-e-ġham hai ḳhud mirī ḳhvāhish kā silsila

yā zulf-e-ḳham-ba-ḳham ki salāsil kaheñ jise

miltā hai mushkiloñ se kisī ke huzūr kā

vo ek lahza ziist kā hāsil kaheñ jise

kashtī shikastgān-e-yam-e-iztirāb ko

terā hī ek naam hai sāhil kaheñ jise

paatī nahīñ faroġh ba-juz soz-o-sāz-e-ishq

sham-e-hayāt dar-ḳhur-e-mahfil kaheñ jise

is dil ko shaad rakhne kī ḳhidmat milī mujhe

ġham-hā-e-rozgār kī manzil kaheñ jise

is daur-e-qadr-dān-e-suḳhan meñ ye ittifāq

shā.ir vahī hai raunaq-e-mahfil kaheñ jise

'mahrūm' chāk-e-sīna-e-har-gul meñ hai vo chiiz

tāsīr-e-nāla-hā-e-anādil kaheñ jise

wo dil kahan hai ahl-e-nazar dil kahen jise

yani niyaz-e-ishq ke qabil kahen jise

zanjir-e-gham hai KHud meri KHwahish ka silsila

ya zulf-e-KHam-ba-KHam ki salasil kahen jise

milta hai mushkilon se kisi ke huzur ka

wo ek lahza zist ka hasil kahen jise

kashti shikastgan-e-yam-e-iztirab ko

tera hi ek nam hai sahil kahen jise

pati nahin farogh ba-juz soz-o-saz-e-ishq

sham-e-hayat dar-KHur-e-mahfil kahen jise

is dil ko shad rakhne ki KHidmat mili mujhe

gham-ha-e-rozgar ki manzil kahen jise

is daur-e-qadr-dan-e-suKHan mein ye ittifaq

shair wahi hai raunaq-e-mahfil kahen jise

'mahrum' chaak-e-sina-e-har-gul mein hai wo chiz

tasir-e-nala-ha-e-anadil kahen jise