wo dost tha to usi ko adu bhi hona tha

vo dost thā to usī ko adū bhī honā thā

lahū pahan ke mujhe surḳh-rū bhī honā thā

sunahrī haath meñ taaza lahū kī fasl na dī

ki apne haq ke liye jañg-jū bhī honā thā

bagūla ban ke samundar meñ ḳhaak uḌānā thī

ki lahar lahar mujhe tund-ḳhū bhī honā thā

mire hī harf dikhāte the merī shakl mujhe

ye ishtihār mire rū-ba-rū bhī honā thā

kashish thī phuul sī is meñ to lā-muhāla mujhe

asīr-e-rañg giraftār-e-bū bhī honā thā

sazā to milnā thī mujh ko barahna lafzoñ kī

zabāñ ke saath laboñ ko rafū bhī honā thā

safar kā bojh uThāne se peshtar 'sājid'

mizāj-dān-e-rah-e-justujū bhī honā thā

wo dost tha to usi ko adu bhi hona tha

lahu pahan ke mujhe surKH-ru bhi hona tha

sunahri hath mein taza lahu ki fasl na di

ki apne haq ke liye jang-ju bhi hona tha

bagula ban ke samundar mein KHak uDana thi

ki lahar lahar mujhe tund-KHu bhi hona tha

mere hi harf dikhate the meri shakl mujhe

ye ishtihaar mere ru-ba-ru bhi hona tha

kashish thi phul si is mein to la-muhaala mujhe

asir-e-rang giraftar-e-bu bhi hona tha

saza to milna thi mujh ko barahna lafzon ki

zaban ke sath labon ko rafu bhi hona tha

safar ka bojh uThane se peshtar 'sajid'

mizaj-dan-e-rah-e-justuju bhi hona tha