wo ek laDki jo KHanda-lab thi na jaane kyun chashm-tar gai wo

vo ek laḌkī jo ḳhanda-lab thī na jaane kyuuñ chashm-tar ga.ī vo

abhī to baiThī sisak rahī thī abhī na jaane kidhar ga.ī vo

vo laḌkī lagtī thī ajnabī sī zarā se khaTke pe chauñktī thī

ye us ke saath hādsa huā kyā ki baiThe baiThe bikhar ga.ī vo

vo koī shai apnī kho chukī thī vo DhūñDhtī us ko phir rahī thī

vo shahr shahr aur gaañv gaañv talāsh meñ dar-ba-dar ga.ī vo

na ham-navā thā na ham-zabāñ thā na dard kā koī rāz-dāñ thā

bas apnī āñkhoñ se qatra qatra Tapak Tapak kar bikhar ga.ī vo

na koī dīvār-o-dar thā koī na ham-safar ham-suḳhan thā koī

bichārī kā koī ghar kahāñ thā ki kah deñ ham apne ghar ga.ī vo

tamām anjān kūche galiyāñ tamām kāñTe tamām chhuriyāñ

kisī tarah apnā dil sambhāle bachā ke dāman guzar ga.ī vo

kisī se qaul-o-qarār thā kyā ki va.adoñ kā e.atibār thā kyā

jahāñ koī surḳh joḌā dekhā to dil ko thāme Thahar ga.ī vo

sitāroñ se jā ke mil ga.ī hai ki bādaloñ meñ chhupī huī hai

uḌaan us kī bahut baḌī thī agarche be-bāl-o-par ga.ī vo

rahī vo saare chaman meñ 'anjum' be-āshnā aur be-shanāsā

maiñ kahtī huuñ paar utar ga.ī vo zamāna kahtā hai mar ga.ī vo

wo ek laDki jo KHanda-lab thi na jaane kyun chashm-tar gai wo

abhi to baiThi sisak rahi thi abhi na jaane kidhar gai wo

wo laDki lagti thi ajnabi si zara se khaTke pe chaunkti thi

ye us ke sath hadsa hua kya ki baiThe baiThe bikhar gai wo

wo koi shai apni kho chuki thi wo DhunDhti us ko phir rahi thi

wo shahr shahr aur ganw ganw talash mein dar-ba-dar gai wo

na ham-nawa tha na ham-zaban tha na dard ka koi raaz-dan tha

bas apni aankhon se qatra qatra Tapak Tapak kar bikhar gai wo

na koi diwar-o-dar tha koi na ham-safar ham-suKHan tha koi

bichaari ka koi ghar kahan tha ki kah den hum apne ghar gai wo

tamam anjaan kuche galiyan tamam kanTe tamam chhuriyan

kisi tarah apna dil sambhaale bacha ke daman guzar gai wo

kisi se qaul-o-qarar tha kya ki wadon ka eatibar tha kya

jahan koi surKH joDa dekha to dil ko thame Thahar gai wo

sitaron se ja ke mil gai hai ki baadalon mein chhupi hui hai

uDan us ki bahut baDi thi agarche be-baal-o-par gai wo

rahi wo sare chaman mein 'anjum' be-ashna aur be-shanasa

main kahti hun par utar gai wo zamana kahta hai mar gai wo