wo hairaton ki mukammal kitab likh dena

vo hairatoñ kī mukammal kitāb likh denā

savāl karne se pahle javāb likh denā

shikast-o-reḳht kā paiham azaab likh denā

vo us kā jāgtī āñkhoñ meñ ḳhvāb likh denā

ajiib tarah batānā hayāt kā mafhūm

vo uñgliyoñ se havā par habāb likh denā

hamāre ghar ke charāġhoñ kā imtihāñ hī sahī

tum āñdhiyoñ ke musalsal azaab likh denā

samundaroñ kī bhī vus.at jo pyaas se kam ho

hamāre ḳhūn-e-jigar ko sharāb likh denā

agar nahīñ shajar-e-sāya-dār rastoñ meñ

saroñ pe jalne hue āftāb likh denā

'qamar' ajiib hai uslūb-e-ḳhāmushī us kā

bas ik nigāh meñ dil kī kitāb likh denā

wo hairaton ki mukammal kitab likh dena

sawal karne se pahle jawab likh dena

shikast-o-reKHt ka paiham azab likh dena

wo us ka jagti aankhon mein KHwab likh dena

ajib tarah batana hayat ka mafhum

wo ungliyon se hawa par habab likh dena

hamare ghar ke charaghon ka imtihan hi sahi

tum aandhiyon ke musalsal azab likh dena

samundaron ki bhi wusat jo pyas se kam ho

hamare KHun-e-jigar ko sharab likh dena

agar nahin shajar-e-saya-dar raston mein

saron pe jalne hue aaftab likh dena

'qamar' ajib hai uslub-e-KHamushi us ka

bas ek nigah mein dil ki kitab likh dena