wo haqiqat mein ek lamha tha

vo haqīqat meñ ek lamha thā

jis kā daurān ye zamāna thā

merī nazroñ se gir paḌī hai zamīñ

kyuuñ bulandī ne is ko dekhā thā

kaisī paivand-kār hai fitrat

muntashir ho ke bhī maiñ yakjā thā

raushnī hai kisī ke hone se

varna buniyād to añdherā thā

jab bhī dekhā nayā lagā mujh ko

kyā tamāshā jahān-e-kohna thā

us ne mahdūd kar diyā ham ko

koī ham se yahāñ ziyāda thā

jab ki sūraj thā pālne vaalā

chāñd se kyā lahū kā rishta thā

mar gayā jo bhī us ke baare meñ

dhyān paḌtā nahīñ ki zinda thā

yahīñ paidā yahīñ javān huā

us ke lab par kahāñ kā qissa thā

koī gunjān thā koī vīrān

koī jangal kisī meñ sahrā thā

'umr saarī vo niiñd meñ bolā

chand lamhoñ ko koī jaagā thā

kahīñ jaane kī sab ne bāteñ kiiñ

kaise aate haiñ kaun bolā thā

saarī uljhan usī se paidā huī

vo jo vāhid hai be-tahāshā thā

dauḌte phir rahe the saare log

jab ki un ko yahīñ pe rahnā thā

tujh ko laanā hisār meñ apne

merā adnā sā ik karishma thā

farq gahrā.ī aur pastī meñ

kisī bulandī se dekh paayā thā

us kī tafsīl meñ thā sargardāñ

zehn meñ muḳhtasar sā ḳhāka thā

paas aa kar use huā mā'lūm

maiñ akelā nahīñ thā tanhā thā

kitne fīsad the jāgne vaale

kitne logoñ ko hosh aayā thā

kis ko ibnus-sabīl kahte 'malāl'

na.e rastoñ kā kaun beTā thā

wo haqiqat mein ek lamha tha

jis ka dauran ye zamana tha

meri nazron se gir paDi hai zamin

kyun bulandi ne is ko dekha tha

kaisi paiwand-kar hai fitrat

muntashir ho ke bhi main yakja tha

raushni hai kisi ke hone se

warna buniyaad to andhera tha

jab bhi dekha naya laga mujh ko

kya tamasha jahan-e-kohna tha

us ne mahdud kar diya hum ko

koi hum se yahan ziyaada tha

jab ki suraj tha palne wala

chand se kya lahu ka rishta tha

mar gaya jo bhi us ke bare mein

dhyan paDta nahin ki zinda tha

yahin paida yahin jawan hua

us ke lab par kahan ka qissa tha

koi gunjaan tha koi viran

koi jangal kisi mein sahra tha

'umr sari wo nind mein bola

chand lamhon ko koi jaga tha

kahin jaane ki sab ne baaten kin

kaise aate hain kaun bola tha

sari uljhan usi se paida hui

wo jo wahid hai be-tahasha tha

dauDte phir rahe the sare log

jab ki un ko yahin pe rahna tha

tujh ko lana hisar mein apne

mera adna sa ek karishma tha

farq gahrai aur pasti mein

kisi bulandi se dekh paya tha

us ki tafsil mein tha sargardan

zehn mein muKHtasar sa KHaka tha

pas aa kar use hua ma'lum

main akela nahin tha tanha tha

kitne fisad the jagne wale

kitne logon ko hosh aaya tha

kis ko ibnus-sabil kahte 'malal'

nae raston ka kaun beTa tha