wo har maqam se pahle wo har maqam ke baad

vo har maqām se pahle vo har maqām ke baa'd

sahar thī shaam se pahle sahar hai shaam ke baa'd

har inqilāb mubārak har inqilāb azaab

shikast-e-jām se pahle shikast-e-jām ke baa'd

mujhī pe itnī tavajjoh mujhī se itnā gurez

mire salām se pahle mire salām ke baa'd

charāġh-e-bazm-e-sitam haiñ hamārā haal na pūchh

jale the shaam se pahle bujhe haiñ shaam ke baa'd

ye raat kuchh bhī nahīñ thī ye raat sab kuchh hai

tulū-e-jām se pahle tulū-e-jām ke baa'd

vahī zabāñ vahī bāteñ magar hai kitnā farq

tumhāre naam se pahle tumhāre naam ke baa'd

hayāt girya-e-shabnam hayāt raqs-e-sharar

tire payām se pahle tire payām ke baa'd

ye tarz-e-fikr ye rañg-e-suḳhan kahāñ 'qābil'

tire kalām se pahle tire kalām ke baa'd

wo har maqam se pahle wo har maqam ke ba'd

sahar thi sham se pahle sahar hai sham ke ba'd

har inqilab mubarak har inqilab azab

shikast-e-jam se pahle shikast-e-jam ke ba'd

mujhi pe itni tawajjoh mujhi se itna gurez

mere salam se pahle mere salam ke ba'd

charagh-e-bazm-e-sitam hain hamara haal na puchh

jale the sham se pahle bujhe hain sham ke ba'd

ye raat kuchh bhi nahin thi ye raat sab kuchh hai

tulu-e-jam se pahle tulu-e-jam ke ba'd

wahi zaban wahi baaten magar hai kitna farq

tumhaare nam se pahle tumhaare nam ke ba'd

hayat girya-e-shabnam hayat raqs-e-sharar

tere payam se pahle tere payam ke ba'd

ye tarz-e-fikr ye rang-e-suKHan kahan 'qabil'

tere kalam se pahle tere kalam ke ba'd