wo husn ko jalwa-gar karenge

vo husn ko jalva-gar kareñge

ārā.ish-e-bām-o-dar kareñge

har goshe meñ hogī ḳhud-numā.ī

har zarre ko rahguzar kareñge

hañs hañs ke kareñge chārasāzī

sāmān-e-dil-o-nazar kareñge

ham bhī sar-e-rāh muntazir haiñ

dekheñ kab idhar nazar kareñge

afsāna-e-ġham tavīl hai dost

is baat ko muḳhtasar kareñge

hai shām-e-firāq saḳht tārīk

is shaam kī ab sahar kareñge

afsurda haiñ zindagī ke tevar

kab tak yūñhī ham basar kareñge

aa.egā 'tabassum' un laboñ par

aañsū bhī kabhī asar kareñge

wo husn ko jalwa-gar karenge

aaraish-e-baam-o-dar karenge

har goshe mein hogi KHud-numai

har zarre ko rahguzar karenge

hans hans ke karenge chaarasazi

saman-e-dil-o-nazar karenge

hum bhi sar-e-rah muntazir hain

dekhen kab idhar nazar karenge

afsana-e-gham tawil hai dost

is baat ko muKHtasar karenge

hai sham-e-firaq saKHt tarik

is sham ki ab sahar karenge

afsurda hain zindagi ke tewar

kab tak yunhi hum basar karenge

aaega 'tabassum' un labon par

aansu bhi kabhi asar karenge