wo ek nigah jo KHamosh si hai barson se

vo ik nigāh jo ḳhāmosh sī hai barsoñ se

ye kaun jaane vo kyā kah rahī hai barsoñ se

hamāre chehroñ pe ab apnā-pan nahīñ ugtā

ye vo zamīñ hai jo banjar paḌī hai barsoñ se

badan kā saarā lahū māñgtā hai vo ik lafz

nigāh zehn kī jis par Tikī hai barsoñ se

kahāñ se lā.ūñ vo tasvīr jo banī hī nahīñ

nazar meñ gard uḌe jā rahī hai barsoñ se

mirī nigāh meñ din hai mire badan meñ hai raat

mirī kitāb adhūrī paḌī hai barsoñ se

samundaroñ meñ kabhī bādaloñ ke ḳhemoñ meñ

ik aag mujh ko liye phir rahī hai barsoñ se

kahāñ kahāñ liye phirtī hai raat ko 'ābid'

vo ik sadā jo mujhe DhūñDhtī hai barsoñ se

wo ek nigah jo KHamosh si hai barson se

ye kaun jaane wo kya kah rahi hai barson se

hamare chehron pe ab apna-pan nahin ugta

ye wo zamin hai jo banjar paDi hai barson se

badan ka sara lahu mangta hai wo ek lafz

nigah zehn ki jis par Tiki hai barson se

kahan se laun wo taswir jo bani hi nahin

nazar mein gard uDe ja rahi hai barson se

meri nigah mein din hai mere badan mein hai raat

meri kitab adhuri paDi hai barson se

samundaron mein kabhi baadalon ke KHemon mein

ek aag mujh ko liye phir rahi hai barson se

kahan kahan liye phirti hai raat ko 'abid'

wo ek sada jo mujhe DhunDhti hai barson se