wo is ada se jo aae to kyun bhala na lage

vo is adā se jo aa.e to kyuuñ bhalā na lage

hazār baar milo phir bhī āshnā na lage

kabhī vo ḳhaas ināyat ki sau gumāñ guzrīñ

kabhī vo tarz-e-taġhāful ki mahramāna lage

vo sīdhī-sādī adā.eñ ki bijliyāñ barseñ

vo dil-barāna muravvat ki āshiqāna lage

dikhā.ūñ dāġh-e-mohabbat jo nāgavār na ho

sunā.ūñ qissa-e-furqat agar burā na lage

bahut hī saada hai tū aur zamāna hai ayyār

ḳhudā kare ki tujhe shahr kī havā na lage

bujhā na deñ ye musalsal udāsiyāñ dil ko

vo baat kar ki tabī.at ko tāziyāna lage

jo ghar ujaḌ ga.e un kā na rañj kar pyāre

vo chāra kar ki ye gulshan ujaaḌ sā na lage

itāb-e-ahl-e-jahāñ sab bhulā diye lekin

vo zaḳhm yaad haiñ ab tak jo ġhā.ebāna lage

vo rañg dil ko diye haiñ lahū kī gardish ne

nazar uThā.ūñ to duniyā nigār-ḳhāna lage

ajiib ḳhvāb dikhāte haiñ nā-ḳhudā ham ko

ġharaz ye hai ki safīna kināre jā na lage

liye hī jaatī hai har-dam koī sadā 'nāsir'

ye aur baat surāġh-e-nishān-e-pā na lage

wo is ada se jo aae to kyun bhala na lage

hazar bar milo phir bhi aashna na lage

kabhi wo KHas inayat ki sau guman guzrin

kabhi wo tarz-e-taghaful ki mahramana lage

wo sidhi-sadi adaen ki bijliyan barsen

wo dil-barana murawwat ki aashiqana lage

dikhaun dagh-e-mohabbat jo nagawar na ho

sunaun qissa-e-furqat agar bura na lage

bahut hi sada hai tu aur zamana hai ayyar

KHuda kare ki tujhe shahr ki hawa na lage

bujha na den ye musalsal udasiyan dil ko

wo baat kar ki tabiat ko taziyana lage

jo ghar ujaD gae un ka na ranj kar pyare

wo chaara kar ki ye gulshan ujaD sa na lage

itab-e-ahl-e-jahan sab bhula diye lekin

wo zaKHm yaad hain ab tak jo ghaebana lage

wo rang dil ko diye hain lahu ki gardish ne

nazar uThaun to duniya nigar-KHana lage

ajib KHwab dikhate hain na-KHuda hum ko

gharaz ye hai ki safina kinare ja na lage

liye hi jati hai har-dam koi sada 'nasir'

ye aur baat suragh-e-nishan-e-pa na lage