wo jagta hai abhi tak ghunud mein hai kahan

vo jāgtā hai abhī tak ġhunūd meñ hai kahāñ

kamī thakan kī magar is vajūd meñ hai kahāñ

kare rukū to Tāñgoñ pe kapkapī chhā.e

vo valvala vo javānī sujūd meñ hai kahāñ

maiñ apne paañv kī miTTī pe jam ke baiThā huuñ

jo merā kunj hai terī hudūd meñ hai kahāñ

ye lutf-e-ḳhāk-nashīnī bhī aarzī shai hai

ki mustaqil sī baqā hast-o-būd meñ hai kahāñ

maiñ apnā kar ke ḳhasārā huuñ mutma.in jaise

vo nafā mujh ko milā tere suud meñ hai kahāñ

sulag rahā hai jigar ḳhushk lakḌiyoñ kī tarah

dhuāñ jo dil se uThā aur duud meñ hai kahāñ

karo talāsh mazāmīr-e-gum-shuda phir se

mazā vo un sā kisī bhī surūd meñ hai kahāñ

zamīñ se tā-ba-falak 'āftāb' chhāyā hai

hunar ye aur kisī ke vajūd meñ hai kahāñ

wo jagta hai abhi tak ghunud mein hai kahan

kami thakan ki magar is wajud mein hai kahan

kare ruku to Tangon pe kapkapi chhae

wo walwala wo jawani sujud mein hai kahan

main apne panw ki miTTi pe jam ke baiTha hun

jo mera kunj hai teri hudud mein hai kahan

ye lutf-e-KHak-nashini bhi aarzi shai hai

ki mustaqil si baqa hast-o-bud mein hai kahan

main apna kar ke KHasara hun mutmain jaise

wo nafa mujh ko mila tere sud mein hai kahan

sulag raha hai jigar KHushk lakDiyon ki tarah

dhuan jo dil se uTha aur dud mein hai kahan

karo talash mazamir-e-gum-shuda phir se

maza wo un sa kisi bhi surud mein hai kahan

zamin se ta-ba-falak 'aftab' chhaya hai

hunar ye aur kisi ke wajud mein hai kahan