wo jis se pyar main diwana-war karta raha

vo jis se pyaar maiñ dīvāna-vār kartā rahā

vo piiTh pīchhe mire mujh pe vaar kartā rahā

jo shaḳhs bandagī-e-kirdgār kartā rahā

vo ḳhud ko dahr meñ yuuñ zī-vaqār kartā rahā

'ajīb shaḳhs thā vo jab talak rahā zinda

ḳhizāñ kī rut meñ bhī jashn-e-bahār kartā rahā

husūl jis kā mirī dastaras se bāhar thā

usī kī chaah meñ dil be-qarār kartā rahā

ye merī jaan hai qurbān us ġhazal-ḳhvāñ par

farāz-e-dār pe jo zikr-e-yār kartā rahā

ḳhayāl kyā hai tumhārā hamāre baare meñ

savāl mujh se koī baar baar kartā rahā

kisī ne us ko biThāyā nahīñ savārī par

musāfiroñ ko jo banda savār kartā rahā

dayār-e-ġhair meñ rah kar bhī tujh ko ḳhāk-e-vatan

hamesha yaad dil-e-ḳhāksār kartā rahā

nasīhatoñ kī jise ḳhud bahut zarūrat thī

vo dūsroñ ko nasīhat hazār kartā rahā

mirī nigāh meñ manzil thī roz-e-avval se

so zabt-e-gardish-e-lail-o-nahār kartā rahā

kisī kā mujh se ye kahnā bhalā lagā mujh ko

kahāñ thā tū maiñ terā intizār kartā rahā

isī pe bārish-e-ne.amat mudām hotī rahī

jo shukr-e-ne.amat-e-parvardigār kartā rahā

jo shahr bhar meñ na thā e'tibār ke qābil

ye dil us pe hī kyoñ e'tibār kartā rahā

use ghamanD thā apne amiir hone par

so mere sāmne dollar shumār kartā rahā

nikhartā jā.egā fan bazm-e-isti.āra kā

jo 'nūrī' chashm-e-karam shahryār kartā rahā

wo jis se pyar main diwana-war karta raha

wo piTh pichhe mere mujh pe war karta raha

jo shaKHs bandagi-e-kirdgar karta raha

wo KHud ko dahr mein yun zi-waqar karta raha

'ajib shaKHs tha wo jab talak raha zinda

KHizan ki rut mein bhi jashn-e-bahaar karta raha

husul jis ka meri dastaras se bahar tha

usi ki chah mein dil be-qarar karta raha

ye meri jaan hai qurban us ghazal-KHwan par

faraaz-e-dar pe jo zikr-e-yar karta raha

KHayal kya hai tumhaara hamare bare mein

sawal mujh se koi bar bar karta raha

kisi ne us ko biThaya nahin sawari par

musafiron ko jo banda sawar karta raha

dayar-e-ghair mein rah kar bhi tujh ko KHak-e-watan

hamesha yaad dil-e-KHaksar karta raha

nasihaton ki jise KHud bahut zarurat thi

wo dusron ko nasihat hazar karta raha

meri nigah mein manzil thi roz-e-awwal se

so zabt-e-gardish-e-lail-o-nahaar karta raha

kisi ka mujh se ye kahna bhala laga mujh ko

kahan tha tu main tera intizar karta raha

isi pe barish-e-neamat mudam hoti rahi

jo shukr-e-neamat-e-parwardigar karta raha

jo shahr bhar mein na tha e'tibar ke qabil

ye dil us pe hi kyon e'tibar karta raha

use ghamanD tha apne amir hone par

so mere samne dollar shumar karta raha

nikharta jaega fan bazm-e-istiara ka

jo 'nuri' chashm-e-karam shahryar karta raha