wo jise dida-wari kahte hain

vo jise dīda-varī kahte haiñ

ham use be-basarī kahte haiñ

naam us kā hai agar bā-ḳhabarī

phir kise be-ḳhabarī kahte haiñ

ye agar lutf-o-karam hai to kise

jaur-o-be-dād-garī kahte haiñ

kyā isī kār-e-nazar-bandī ko

husn kī jalvagarī kahte haiñ

gul ke aurāq pe kāñToñ kā gumāñ

kyā ise ḳhush-nazarī kahte haiñ

bahr-e-bīmār davā hai na duā

kyā ise chāragarī kahte haiñ

kam kisī ko ye ḳhabar hai ki kise

ranj-e-be-bāl-o-parī kahte haiñ

yās-o-hirmāñ ko ba-alfāz-e-digar

aah kī be-asarī kahte haiñ

naam hai vo bhī jigar-dārī kā

ham jise be-jigarī kahte haiñ

aap ḳhud bhī to gul-andāmoñ ko

huur kahte haiñ parī kahte haiñ

fasl-e-gul hī to hai vo ham jis ko

mausam-e-jāma-darī kahte haiñ

ishq meñ ain hunar-mandī hai

sab jise be-hunarī kahte haiñ

muft kī dard-sarī ko ham bhī

muft kī dard-sarī kahte haiñ

aap se ham se banī hai na bane

aap ḳhushkī ko tarī kahte haiñ

kyā koī baat kabhī ahl-e-junūñ

az-rah-e-nām-varī kahte haiñ

ham pe ye bhī hai ik ilzām ki ham

dāstāñ dard-bharī kahte haiñ

koī ḳhush ho ki ḳhafā ho 'hairat'

ham to har baat kharī kahte haiñ

wo jise dida-wari kahte hain

hum use be-basari kahte hain

nam us ka hai agar ba-KHabari

phir kise be-KHabari kahte hain

ye agar lutf-o-karam hai to kise

jaur-o-be-dad-gari kahte hain

kya isi kar-e-nazar-bandi ko

husn ki jalwagari kahte hain

gul ke auraq pe kanTon ka guman

kya ise KHush-nazari kahte hain

bahr-e-bimar dawa hai na dua

kya ise chaaragari kahte hain

kam kisi ko ye KHabar hai ki kise

ranj-e-be-baal-o-pari kahte hain

yas-o-hirman ko ba-alfaz-e-digar

aah ki be-asari kahte hain

nam hai wo bhi jigar-dari ka

hum jise be-jigari kahte hain

aap KHud bhi to gul-andamon ko

hur kahte hain pari kahte hain

fasl-e-gul hi to hai wo hum jis ko

mausam-e-jama-dari kahte hain

ishq mein ain hunar-mandi hai

sab jise be-hunari kahte hain

muft ki dard-sari ko hum bhi

muft ki dard-sari kahte hain

aap se hum se bani hai na bane

aap KHushki ko tari kahte hain

kya koi baat kabhi ahl-e-junun

az-rah-e-nam-wari kahte hain

hum pe ye bhi hai ek ilzam ki hum

dastan dard-bhari kahte hain

koi KHush ho ki KHafa ho 'hairat'

hum to har baat khari kahte hain