wo jo ghazlon ke ustad hain doston

vo jo ġhazloñ ke ustād haiñ dostoñ

kyā kaheñ kitne jallād haiñ dostoñ

zindagī kī zabāñ un ko aatī nahīñ

vo kitāboñ kī ījād hai dostoñ

ek bhī sher ġhālib kā samjhe nahīñ

vaise ġhālib kī aulād haiñ dostoñ

bulbuloñ sī vo ġhazleñ sañvāreñge kyā

vo taḳhallus se sayyād haiñ dostoñ

kyā ajab shaḳhs haiñ kuchh bhī samjhe binā

de rahe daad par daad haiñ dostoñ

un ke shāgird jo bhī haiñ barbād haiñ

aur vo haiñ ki ābād haiñ dostoñ

ab bhī saaqī surāhī meñ uljhe haiñ vo

guzre vaqtoñ kī ik yaad haiñ dostoñ

wo jo ghazlon ke ustad hain doston

kya kahen kitne jallad hain doston

zindagi ki zaban un ko aati nahin

wo kitabon ki ijad hai doston

ek bhi sher ghaalib ka samjhe nahin

waise ghaalib ki aulad hain doston

bulbulon si wo ghazlen sanwarenge kya

wo taKHallus se sayyaad hain doston

kya ajab shaKHs hain kuchh bhi samjhe bina

de rahe dad par dad hain doston

un ke shagird jo bhi hain barbaad hain

aur wo hain ki aabaad hain doston

ab bhi saqi surahi mein uljhe hain wo

guzre waqton ki ek yaad hain doston