wo jo ek umr se masruf ibaadat mein the

vo jo ik umr se masrūf ibādāt meñ the

aañkh kholī to abhī arsa-e-zulmāt meñ the

sirf āfāt na thiiñ zāt-e-ilāhī kā subūt

phuul bhī dasht meñ the hashr bhī jazbāt meñ the

na ye taqdīr kā likhā thā na manshā-e-ḳhudā

hādse mujh pe jo guzre mire hālāt meñ the

maiñ ne kī hadd-e-nazar paar to ye raaz khulā

āsmāñ the to faqat mere ḳhayālāt meñ the

mere dil par to girīñ aable ban kar būñdeñ

kaun sī yaad ke sahrā the jo barsāt meñ the

is sabab se bhī to maiñ qābil-e-nafrat Thahrā

jitne jauhar the mohabbat ke mirī zaat meñ the

sirf shaitān hī na thā munkir-e-takrīm 'nadīm'

arsh par jitne farishte the mirī ghaat meñ the

wo jo ek umr se masruf ibaadat mein the

aankh kholi to abhi arsa-e-zulmat mein the

sirf aafat na thin zat-e-ilahi ka subut

phul bhi dasht mein the hashr bhi jazbaat mein the

na ye taqdir ka likha tha na mansha-e-KHuda

hadse mujh pe jo guzre mere haalat mein the

main ne ki hadd-e-nazar par to ye raaz khula

aasman the to faqat mere KHayalat mein the

mere dil par to girin aable ban kar bunden

kaun si yaad ke sahra the jo barsat mein the

is sabab se bhi to main qabil-e-nafrat Thahra

jitne jauhar the mohabbat ke meri zat mein the

sirf shaitan hi na tha munkir-e-takrim 'nadim'

arsh par jitne farishte the meri ghat mein the