wo jo mere pas se ho kar kisi ke ghar gaya

vo jo mere paas se ho kar kisī ke ghar gayā

reshmī malbūs kī ḳhushbū se jaadū kar gayā

ik jhalak dekhī thī us rū-e-dil-ārā kī kabhī

phir na āñkhoñ se vo aisā dilrubā manzar gayā

shahr kī galiyoñ meñ gahrī tīrgī giryāñ rahī

raat bādal is tarah aa.e ki maiñ to Dar gayā

thī vatan meñ muntazir jis kī koī chashm-e-hasīñ

vo musāfir jaane kis sahrā meñ jal kar mar gayā

sub.h-e-kāzib kī havā meñ dard thā kitnā 'munīr'

rail kī siiTī bajī to dil lahū se bhar gayā

wo jo mere pas se ho kar kisi ke ghar gaya

reshmi malbus ki KHushbu se jadu kar gaya

ek jhalak dekhi thi us ru-e-dil-ara ki kabhi

phir na aankhon se wo aisa dilruba manzar gaya

shahr ki galiyon mein gahri tirgi giryan rahi

raat baadal is tarah aae ki main to Dar gaya

thi watan mein muntazir jis ki koi chashm-e-hasin

wo musafir jaane kis sahra mein jal kar mar gaya

subh-e-kazib ki hawa mein dard tha kitna 'munir'

rail ki siTi baji to dil lahu se bhar gaya