wo jo mumkin na ho mumkin ye bana deta hai

vo jo mumkin na ho mumkin ye banā detā hai

ḳhvāb dariyā ke kināroñ ko milā detā hai

zindagī bhar kī riyāzat mirī be-kār ga.ī

ik ḳhayāl aayā thā badle meñ vo kyā detā hai

ab mujhe lagtā hai dushman mirā apnā chehra

mujh se pahle ye mirā haal batā detā hai

chand jumle vo adā kartā hai aise Dhab se

mere afkār kī buniyād hilā detā hai

ye bhī e.ajāz-e-mohabbat hai ki rone vaalā

rote rote tujhe hañsne kī duā detā hai

zindagī jañg hai a.asāb kī aur ye bhī suno

ishq a.asāb ko mazbūt banā detā hai

baiThe baiThe use kyā hotā hai jaane 'taimūr'

jaltā cigaret vo hathelī pe bujhā detā hai

ye jahāñ is liye achchhā nahīñ lagtā 'taimūr'

jab bhī detā hai mujhe terā gilā detā hai

wo jo mumkin na ho mumkin ye bana deta hai

KHwab dariya ke kinaron ko mila deta hai

zindagi bhar ki riyazat meri be-kar gai

ek KHayal aaya tha badle mein wo kya deta hai

ab mujhe lagta hai dushman mera apna chehra

mujh se pahle ye mera haal bata deta hai

chand jumle wo ada karta hai aise Dhab se

mere afkar ki buniyaad hila deta hai

ye bhi eajaz-e-mohabbat hai ki rone wala

rote rote tujhe hansne ki dua deta hai

zindagi jang hai aasab ki aur ye bhi suno

ishq aasab ko mazbut bana deta hai

baiThe baiThe use kya hota hai jaane 'taimur'

jalta cigaret wo hatheli pe bujha deta hai

ye jahan is liye achchha nahin lagta 'taimur'

jab bhi deta hai mujhe tera gila deta hai