wo kash waqt ke pahre ko toD kar aate

vo kaash vaqt ke pahre ko toḌ kar aate

jo mahv-e-ḳhvāb haiñ un ko jhiñjhoḌ kar aate

na uThtī koī nigāh-e-ġhalat sar-e-mahfil

vo apne jalve ko ghar apne chhoḌ kar aate

udaas āñkhoñ ko dekhā to ye ḳhayāl aayā

chaman ke phūloñ se shabnam nichoḌ kar aate

asā-e-mūsā kabhī haath lag gayā hotā

fir.aun-e-vaqt kā sar ham bhī phoḌ kar aate

agar thī chehre pe raunaq kī aarzū un ko

musībatoñ kī kalā.ī maroḌ kar aate

udhar na nikleñge vo nazar-e-bad kā ḳhadsha hai

ḳhabar ye hotī to ham āñkheñ phoḌ kar aate

sunā ki aaj bhī dānishvaroñ meñ ḳhuub machī

'asar' bhī aate to himmat baTor kar aate

wo kash waqt ke pahre ko toD kar aate

jo mahw-e-KHwab hain un ko jhinjhoD kar aate

na uThti koi nigah-e-ghalat sar-e-mahfil

wo apne jalwe ko ghar apne chhoD kar aate

udas aankhon ko dekha to ye KHayal aaya

chaman ke phulon se shabnam nichoD kar aate

asa-e-musa kabhi hath lag gaya hota

firaun-e-waqt ka sar hum bhi phoD kar aate

agar thi chehre pe raunaq ki aarzu un ko

musibaton ki kalai maroD kar aate

udhar na niklenge wo nazar-e-bad ka KHadsha hai

KHabar ye hoti to hum aankhen phoD kar aate

suna ki aaj bhi danishwaron mein KHub machi

'asar' bhi aate to himmat baTor kar aate