wo kahte hain ki hai TuTe hue dil par karam mera

vo kahte haiñ ki hai TuuTe hue dil par karam merā

magar min-jumla-e-ādāb-e-ġham-ḳhvārī hai ġham merā

vahāñ sajde se ab tak qudsiyoñ ke sar nahīñ uThte

paḌā thā jis jagah rāh-e-mohabbat meñ qadam merā

zahe taqdīr-e-nākāmī ki terī maslahat Thahrī

tirī marzī se vābasta huā allāh re ġham merā

na jāneñ is safar kī manzil-e-avval kahāñ hogī

fanā kī āḳhirī manzil pe hai pahlā qadam merā

mire josh-e-talab kī shān-e-istiġhnā koī dekhe

ki maiñ rahbar se aage mujh se aage hai qadam merā

maiñ vo āzurda-e-vahm-e-musarrat huuñ ma.āz-allāh

ki ġham ko ġham samajhne se bhī ghabrātā hai dam merā

ye mahrūm-e-tabassum mīr-e-sāmān-e-tabassum hai

tirī bazm-e-tarab meñ mo'tabar hai ashk-e-ġham merā

ab aage kis se likkhā jaa.e āġhāz-e-mohabbat par

fasāna ḳhatm kar dete haiñ arbāb-e-qalam merā

mirī āvārgī har qaid se be-zār hai shāyad

ki ab us kī galī meñ bhī guzar hotā hai kam merā

baqā kahte haiñ jis ko vo mirā ehsān hai 'fānī'

vo hādis huuñ ki duniyā-e-qadam bhartī hai dam merā

wo kahte hain ki hai TuTe hue dil par karam mera

magar min-jumla-e-adab-e-gham-KHwari hai gham mera

wahan sajde se ab tak qudsiyon ke sar nahin uThte

paDa tha jis jagah rah-e-mohabbat mein qadam mera

zahe taqdir-e-nakaami ki teri maslahat Thahri

teri marzi se wabasta hua allah re gham mera

na jaanen is safar ki manzil-e-awwal kahan hogi

fana ki aaKHiri manzil pe hai pahla qadam mera

mere josh-e-talab ki shan-e-istighna koi dekhe

ki main rahbar se aage mujh se aage hai qadam mera

main wo aazurda-e-wahm-e-musarrat hun maaz-allah

ki gham ko gham samajhne se bhi ghabraata hai dam mera

ye mahrum-e-tabassum mir-e-saman-e-tabassum hai

teri bazm-e-tarab mein mo'tabar hai ashk-e-gham mera

ab aage kis se likkha jae aaghaz-e-mohabbat par

fasana KHatm kar dete hain arbab-e-qalam mera

meri aawargi har qaid se be-zar hai shayad

ki ab us ki gali mein bhi guzar hota hai kam mera

baqa kahte hain jis ko wo mera ehsan hai 'fani'

wo hadis hun ki duniya-e-qadam bharti hai dam mera