wo kahte hain ranjish ki baaten bhula den

vo kahte haiñ ranjish kī bāteñ bhulā deñ

mohabbat kareñ ḳhush raheñ muskurā deñ

ġhurūr aur hamārā ġhurūr-e-mohabbat

mah o mehr ko un ke dar par jhukā deñ

javānī ho gar jāvedānī to yā rab

tirī saada duniyā ko jannat banā deñ

shab-e-vasl kī be-ḳhudī chhā rahī hai

kaho to sitāroñ kī sham.eñ bujhā deñ

bahāreñ simaT aa.eñ khil jaa.eñ kaliyāñ

jo ham tum chaman meñ kabhī muskurā deñ

ibādat hai ik be-ḳhudī se ibārat

haram ko mai-e-mushk-bū se basā deñ

vo ā.eñge aaj ai bahār-e-mohabbat

sitāroñ ke bistar pe kaliyāñ bichhā deñ

banātā hai muñh talḳhi-e-mai se zāhid

tujhe bāġh-e-rizvāñ se kausar mañgā deñ

jinheñ umr bhar yaad aanā sikhāyā

vo dil se tirī yaad kyūñkar bhulā deñ

tum afsāna-e-qais kyā pūchhte ho

idhar aao ham tum ko lailā banā deñ

ye be-dardiyāñ kab tak ai dard-e-ġhurbat

butoñ ko phir arz-e-haram meñ basā deñ

vo sarmastiyāñ baḳhsh ai rashk-e-shīrīñ

ki ḳhusrū ko ḳhvāb-e-adam se jagā deñ

tire vasl kī be-ḳhudī kah rahī hai

ḳhudā.ī to kyā ham ḳhudā ko bhulā deñ

unheñ apnī sūrat pe yuuñ naaz kab thā

mire ishq-e-rusvā ko 'aḳhtar' duā deñ

wo kahte hain ranjish ki baaten bhula den

mohabbat karen KHush rahen muskura den

ghurur aur hamara ghurur-e-mohabbat

mah o mehr ko un ke dar par jhuka den

jawani ho gar jawedani to ya rab

teri sada duniya ko jannat bana den

shab-e-wasl ki be-KHudi chha rahi hai

kaho to sitaron ki shamen bujha den

bahaaren simaT aaen khil jaen kaliyan

jo hum tum chaman mein kabhi muskura den

ibaadat hai ek be-KHudi se ibarat

haram ko mai-e-mushk-bu se basa den

wo aaenge aaj ai bahaar-e-mohabbat

sitaron ke bistar pe kaliyan bichha den

banata hai munh talKHi-e-mai se zahid

tujhe bagh-e-rizwan se kausar manga den

jinhen umr bhar yaad aana sikhaya

wo dil se teri yaad kyunkar bhula den

tum afsana-e-qais kya puchhte ho

idhar aao hum tum ko laila bana den

ye be-dardiyan kab tak ai dard-e-ghurbat

buton ko phir arz-e-haram mein basa den

wo sarmastiyan baKHsh ai rashk-e-shirin

ki KHusru ko KHwab-e-adam se jaga den

tere wasl ki be-KHudi kah rahi hai

KHudai to kya hum KHuda ko bhula den

unhen apni surat pe yun naz kab tha

mere ishq-e-ruswa ko 'aKHtar' dua den