wo kahte the ki dekho chintiyon ke par nikal aae

vo kahte the ki dekho chīñtiyoñ ke par nikal aa.e

bas itnī baat thī ham chhoḌ apnā ghar nikal aa.e

hamāre shahr meñ sar kī hifāzat mas.ala Thahrā

kise mā'lūm hai kis samt se patthar nikal aa.e

kisī āvāz ne āvāz dī ḳhāmoshiyāñ TūTīñ

jahāñ thiiñ sirf dīvāreñ vahāñ par dar nikal aa.e

mirī fihrist se ek naam bhī ḳhārij nahīñ hotā

na jaane kaun kin hālāt meñ behtar nikal aa.e

'musavvir' log kuchh bāhar ke andar jam ke baiThe haiñ

jinheñ andar hī rahnā thā vo bas bāhar nikal aa.e

wo kahte the ki dekho chintiyon ke par nikal aae

bas itni baat thi hum chhoD apna ghar nikal aae

hamare shahr mein sar ki hifazat masala Thahra

kise ma'lum hai kis samt se patthar nikal aae

kisi aawaz ne aawaz di KHamoshiyan TuTin

jahan thin sirf diwaren wahan par dar nikal aae

meri fihrist se ek nam bhi KHarij nahin hota

na jaane kaun kin haalat mein behtar nikal aae

'musawwir' log kuchh bahar ke andar jam ke baiThe hain

jinhen andar hi rahna tha wo bas bahar nikal aae