wo KHush-suKHan to kisi pairwi se KHush na hua

vo ḳhush-suḳhan to kisī pairvī se ḳhush na huā

mizāj-e-lakhnavī-o-dehlavī se ḳhush na huā

malāl ye hai ki āḳhir bichhaḌ gayā mujh se

vo ham-safar jo mirī ḳhush-ravī se ḳhush na huā

tujhe ḳhabar bhī hai kyā kyā ḳhayāl aatā hai

ki jī tire suḳhan-e-multavī se ḳhush na huā

faqīr shaah nahīñ shāh-sāz hotā hai

ye ḳhush-nazar nigah-e-ḳhusravī se ḳhush na huā

saje hue haiñ abhī dil meñ ḳhvāhishāt ke but

ye somnāt kabhī ġhaznavī se ḳhush na huā

vo aadmī hai jo āb-e-hayāt kā pyāsā

sharāb-e-īsavī-o-mūsavī se ḳhush na huā

vo kam-suḳhan to mirā dushman-e-suḳhan niklā

ġhazal se ḳhush na huā masnavī se ḳhush na huā

usī ko aayā sar āñkhoñ pe baiThne kā hunar

jo apnī haisiyat-e-sānavī se ḳhush na huā

ra.uuf 'ḳhair' bhalā tum se kaise ḳhush hogā

vo maulvī jo kisī maulvī se ḳhush na huā

wo KHush-suKHan to kisi pairwi se KHush na hua

mizaj-e-lakhnawi-o-dehlawi se KHush na hua

malal ye hai ki aaKHir bichhaD gaya mujh se

wo ham-safar jo meri KHush-rawi se KHush na hua

tujhe KHabar bhi hai kya kya KHayal aata hai

ki ji tere suKHan-e-multawi se KHush na hua

faqir shah nahin shah-saz hota hai

ye KHush-nazar nigah-e-KHusrawi se KHush na hua

saje hue hain abhi dil mein KHwahishat ke but

ye somnat kabhi ghaznawi se KHush na hua

wo aadmi hai jo aab-e-hayat ka pyasa

sharab-e-isawi-o-musawi se KHush na hua

wo kam-suKHan to mera dushman-e-suKHan nikla

ghazal se KHush na hua masnawi se KHush na hua

usi ko aaya sar aankhon pe baiThne ka hunar

jo apni haisiyat-e-sanawi se KHush na hua

rauf 'KHair' bhala tum se kaise KHush hoga

wo maulwi jo kisi maulwi se KHush na hua