wo kisi aur se mila hoga

vo kisī aur se milā hogā

dil ye kahtā hai vāhima hogā

mere dil meñ dhamāl paḌtī hai

log shak meñ ki āriza hogā

us kī yaaro ḳhabar hī le aao

koī darpesh mas.ala hogā

paañv tikTā nahīñ zamīñ par kyoñ

ġhaur se dekh aabla hogā

ḳhāmushī ko javāb mat samjho

ain mumkin na kuchh sunā hogā

tum jise kā.enāt kahte ho

yaar paanī kā bulbula hogā

ab ḳhudā ko hai faisla karnā

vo tirā hogā yā mirā hogā

jaao duniyā maiñ kuchh nahīñ kahtā

roz-e-mahshar hī sāmnā hogā

ḳhāmushī ko zabān kahte haiñ

ek din is kā tarjuma hogā

kuchh farishte haiñ sāmne mere

ab to har haal ma.arka hogā

tum jise ishq jaan baiThe ho

un kā mumkin hai mashġhala hogā

lauh-e-mahfūz par jo likkhā hai

us se haT kar bhī faisla hogā

soch lo dekh-bhāl lo 'dānish'

ishq hogā to ratjagā hogā

wo kisi aur se mila hoga

dil ye kahta hai wahima hoga

mere dil mein dhamal paDti hai

log shak mein ki aariza hoga

us ki yaro KHabar hi le aao

koi darpesh masala hoga

panw tikTa nahin zamin par kyon

ghaur se dekh aabla hoga

KHamushi ko jawab mat samjho

ain mumkin na kuchh suna hoga

tum jise kaenat kahte ho

yar pani ka bulbula hoga

ab KHuda ko hai faisla karna

wo tera hoga ya mera hoga

jao duniya main kuchh nahin kahta

roz-e-mahshar hi samna hoga

KHamushi ko zaban kahte hain

ek din is ka tarjuma hoga

kuchh farishte hain samne mere

ab to har haal marka hoga

tum jise ishq jaan baiThe ho

un ka mumkin hai mashghala hoga

lauh-e-mahfuz par jo likkha hai

us se haT kar bhi faisla hoga

soch lo dekh-bhaal lo 'danish'

ishq hoga to ratjaga hoga