wo kisi par jafa nahin karte

vo kisī par jafā nahīñ karte

aitabār-e-vafā nahīñ karte

ek ham se ḳhafā hai ḳhalq-e-ḳhudā

log duniyā meñ kyā nahīñ karte

ai nasīhat-garo ḳhudā ke liye

yuuñ nasīhat kiyā nahīñ karte

sar na khaao ki ishq-e-lāla-ruḳhāñ

ham ne kah jo diyā nahīñ karte

saḳht mushkil hai dilbarī dekheñ

aap karte haiñ yā nahīñ karte

ġham-e-jānāñ ho yā ġham-e-daurāñ

tiir un ke ḳhatā nahīñ karte

mar bhī jaa.eñ to ham sar-e-mahfil

sāqiyā sāqiyā nahīñ karte

ai azīzo tumhārī shart nahīñ

ham to apnā kahā nahīñ karte

dost haiñ bevafā magar 'ābid'

muñh se aisā kahā nahīñ karte

wo kisi par jafa nahin karte

aitabar-e-wafa nahin karte

ek hum se KHafa hai KHalq-e-KHuda

log duniya mein kya nahin karte

ai nasihat-garo KHuda ke liye

yun nasihat kiya nahin karte

sar na khao ki ishq-e-lala-ruKHan

hum ne kah jo diya nahin karte

saKHt mushkil hai dilbari dekhen

aap karte hain ya nahin karte

gham-e-jaanan ho ya gham-e-dauran

tir un ke KHata nahin karte

mar bhi jaen to hum sar-e-mahfil

saqiya saqiya nahin karte

ai azizo tumhaari shart nahin

hum to apna kaha nahin karte

dost hain bewafa magar 'abid'

munh se aisa kaha nahin karte