wo kya kuchh na karne wale the

vo kyā kuchh na karne vaale the

bas koī dam meñ marne vaale the

the gile aur gard-e-bād kī shaam

aur ham sab bikharne vaale the

vo jo aatā to us kī ḳhushbū meñ

aaj ham rañg bharne vaale the

sirf afsos hai ye tanz nahīñ

tum na sañvre sañvarne vaale the

yuuñ to marnā hai ek baar magar

ham ka.ī baar marne vaale the

wo kya kuchh na karne wale the

bas koi dam mein marne wale the

the gile aur gard-e-baad ki sham

aur hum sab bikharne wale the

wo jo aata to us ki KHushbu mein

aaj hum rang bharne wale the

sirf afsos hai ye tanz nahin

tum na sanwre sanwarne wale the

yun to marna hai ek bar magar

hum kai bar marne wale the