wo lahu roi hain aankhen ki batana mushkil

vo lahū roī haiñ āñkheñ ki batānā mushkil

ab koī ḳhvāb in āñkhoñ meñ sajānā mushkil

kitnī yādeñ thiiñ ki gard-e-rah-e-ayyām huiiñ

kitne chehroñ kā huā dhyān meñ laanā mushkil

kitne shab-ḳhūñ the ujāloñ pe jo maare na ga.e

kitnī sham.eñ thiiñ huā jin kā jalānā mushkil

kitne darvāze diloñ ke the jo dīvār bane

aisī dīvār ki dar jis meñ banānā mushkil

rañg jitne the bahāroñ meñ bahāroñ se ga.e

is chaman-zār meñ ab jī kā lagānā mushkil

vo bhī ai shahr-e-nigārāñ thā koī mausam ḳhvāb

biit jaane pe bhī hai jis ko bhulānā mushkil

raqs karte hue kāñToñ pe chale ham varna

har-qadam raah meñ thā phuul khilānā mushkil

yūñhī chaḌhtā rahā gar dard kā dariyā to 'jamāl'

kashtī-e-jāñ ko kināre se lagānā mushkil

wo lahu roi hain aankhen ki batana mushkil

ab koi KHwab in aankhon mein sajaana mushkil

kitni yaaden thin ki gard-e-rah-e-ayyam huin

kitne chehron ka hua dhyan mein lana mushkil

kitne shab-KHun the ujalon pe jo mare na gae

kitni shamen thin hua jin ka jalana mushkil

kitne darwaze dilon ke the jo diwar bane

aisi diwar ki dar jis mein banana mushkil

rang jitne the bahaaron mein bahaaron se gae

is chaman-zar mein ab ji ka lagana mushkil

wo bhi ai shahr-e-nigaran tha koi mausam KHwab

bit jaane pe bhi hai jis ko bhulana mushkil

raqs karte hue kanTon pe chale hum warna

har-qadam rah mein tha phul khilana mushkil

yunhi chaDhta raha gar dard ka dariya to 'jamal'

kashti-e-jaan ko kinare se lagana mushkil