wo log to aankhon se bhi dekha nahin karte

vo log to āñkhoñ se bhī dekhā nahīñ karte

jo dil ke darīchoñ ko kabhī vā nahīñ karte

aisī hī kashākash meñ ulaT jaatī hai duniyā

sañbhle na agar dil to sambhālā nahīñ karte

rakhte haiñ mohabbat ko taġhāful meñ chhupā kar

parvā hī to karte haiñ jo parvā nahīñ karte

hogā koī ham jaisā kahāñ hijr-gazīda

mātam bhī to tanhā.ī kā tanhā nahīñ karte

is chāk-garebānī pe samjhāne lage sab

dhāge bhī ye kahte haiñ ki uljhā nahīñ karte

kahte haiñ sabhī sust magar aap kaheñ kyuuñ

kah deñ jo kabhī aap to ham kyā nahīñ karte

'aḳhtar' ko burā kahte koī baat nahīñ thī

'ġhālib' ko burā kahte ho achchhā nahīñ karte

wo log to aankhon se bhi dekha nahin karte

jo dil ke darichon ko kabhi wa nahin karte

aisi hi kashakash mein ulaT jati hai duniya

sanbhle na agar dil to sambhaala nahin karte

rakhte hain mohabbat ko taghaful mein chhupa kar

parwa hi to karte hain jo parwa nahin karte

hoga koi hum jaisa kahan hijr-gazida

matam bhi to tanhai ka tanha nahin karte

is chaak-garebani pe samjhane lage sab

dhage bhi ye kahte hain ki uljha nahin karte

kahte hain sabhi sust magar aap kahen kyun

kah den jo kabhi aap to hum kya nahin karte

'aKHtar' ko bura kahte koi baat nahin thi

'ghaalib' ko bura kahte ho achchha nahin karte