wo mahtab abhi baam par nahin aaya

vo māhtāb abhī baam par nahīñ aayā

mirī duāoñ meñ shāyad asar nahīñ aayā

bahut ajiib hai yāroñ bulandiyoñ kā tilism

jo ek baar gayā lauT kar nahīñ aayā

ye kā.enāt kī vus.at khulī nahīñ mujh par

maiñ apnī zaat se jab tak guzar nahīñ aayā

bahut dinoñ se hai be-shakl sī merī miTTī

bahut dinoñ se koī kūza-gar nahīñ aayā

bas ek lamhe ko be-pairāhan use dekhā

phir is ke ba.ad mujhe kuchh nazar nahīñ aayā

ham ab bhī dasht meñ ḳhema lagā.e baiThe haiñ

hamāre hisse meñ apnā hī ghar nahīñ aayā

zamīn bāñjh na ho jaa.e kuchh kaho 'az.har'

suḳhan kī shāḳh pe kab se samar nahīñ aayā

wo mahtab abhi baam par nahin aaya

meri duaon mein shayad asar nahin aaya

bahut ajib hai yaron bulandiyon ka tilism

jo ek bar gaya lauT kar nahin aaya

ye kaenat ki wusat khuli nahin mujh par

main apni zat se jab tak guzar nahin aaya

bahut dinon se hai be-shakl si meri miTTi

bahut dinon se koi kuza-gar nahin aaya

bas ek lamhe ko be-pairahan use dekha

phir is ke baad mujhe kuchh nazar nahin aaya

hum ab bhi dasht mein KHema lagae baiThe hain

hamare hisse mein apna hi ghar nahin aaya

zamin banjh na ho jae kuchh kaho 'azhar'

suKHan ki shaKH pe kab se samar nahin aaya