wo mar dega agar KHanjar-e-tabassum se

vo maar degā agar ḳhanjar-e-tabassum se

to gungunā.uñgā kaise ġhazal tarannum se

sajī hai tere liye kā.enāt-e-sher-o-suḳhan

ġhazal ye merī hai mansūb jān-e-man tum se

qazā namāz-e-mohabbat na ho kisī sūrat

agar vuzū nahīñ mumkin to paḌh tayammum se

tū bā-hunar hai ki hai be-hunar mire jaisā

ye rāz-e-basta khulegā tire takallum se

shanāvarī kā hunar hī mujhe nahīñ aatā

bachā.ūñ kaise tujhe bahr-e-pur-talātum se

mire liye to mire ghar kā hauz kaafī hai

karūñgā kyā bhalā logo maiñ bahr-o-qulzum se

yazīd-e-vaqt kī nīñdeñ harām hotī haiñ

husain ab bhī tire ijtimā-e-chehlum se

sitāra us ke muqaddar kā jab nahīñ chamkā

uThā hai dushmanī karne vo bazm-e-anjum se

mire safīna-e-hastī ke nāḳhudā tum ho

ye Dagmagā nahīñ saktā kisī talātum se

kisī ke saath mujhe dekh kar kisī ne kahā

ye bevafā.ī kī ummīd to na thī tum se

namāz-e-ishq ḳhudā kī adā.egī ke liye

zamīñ pe aa.egā koī falak chahārum se

ye lafz sunte hī mahbūb yaad aate haiñ

jabhī to uns hai is dil ko lafz-e-panjum se

qadam qadam pe jahālat use satā.egī

jo duur ho gayā tā'līm aur ta.allum se

mujhe hai jaldī mujhe aur kahīñ bhī jaanā hai

kahā ye us ne ki maiñ kal milūñgā phir tum se

usī samāj ke afrād sang-dil nikle

samāj ḳhālī thā jo jazba-e-tarahhum se

ḳhushī se lauTnā apne vatan ko ai 'nūrī'

huā jo fāriġh-e-tahsīl hauza-e-qum se

wo mar dega agar KHanjar-e-tabassum se

to gungunaunga kaise ghazal tarannum se

saji hai tere liye kaenat-e-sher-o-suKHan

ghazal ye meri hai mansub jaan-e-man tum se

qaza namaz-e-mohabbat na ho kisi surat

agar wuzu nahin mumkin to paDh tayammum se

tu ba-hunar hai ki hai be-hunar mere jaisa

ye raaz-e-basta khulega tere takallum se

shanawari ka hunar hi mujhe nahin aata

bachaun kaise tujhe bahr-e-pur-talatum se

mere liye to mere ghar ka hauz kafi hai

karunga kya bhala logo main bahr-o-qulzum se

yazid-e-waqt ki ninden haram hoti hain

husain ab bhi tere ijtima-e-chehlum se

sitara us ke muqaddar ka jab nahin chamka

uTha hai dushmani karne wo bazm-e-anjum se

mere safina-e-hasti ke naKHuda tum ho

ye Dagmaga nahin sakta kisi talatum se

kisi ke sath mujhe dekh kar kisi ne kaha

ye bewafai ki ummid to na thi tum se

namaz-e-ishq KHuda ki adaegi ke liye

zamin pe aaega koi falak chahaarum se

ye lafz sunte hi mahbub yaad aate hain

jabhi to uns hai is dil ko lafz-e-panjum se

qadam qadam pe jahaalat use sataegi

jo dur ho gaya ta'lim aur tallum se

mujhe hai jaldi mujhe aur kahin bhi jaana hai

kaha ye us ne ki main kal milunga phir tum se

usi samaj ke afrad sang-dil nikle

samaj KHali tha jo jazba-e-tarahhum se

KHushi se lauTna apne watan ko ai 'nuri'

hua jo farigh-e-tahsil hauza-e-qum se