wo maqtal mein agar khinche hue talwar baiThe hain

vo maqtal meñ agar khīñche hue talvār baiThe haiñ

to ham bhī jaan dene ke liye tayyār baiThe haiñ

dar-e-pīr-e-muġhāñ par is tarah mai-ḳhvār baiThe haiñ

ki kuchh maḳhmūr baiThe haiñ to kuchh sarshār baiThe haiñ

agar vo gāliyāñ dene par āmāda haiñ ḳhalvat meñ

to ham bhī arz-e-matlab ke liye tayyār baiThe haiñ

galā maiñ kaaT luuñ ḳhud ik ishāra ho jo abrū kā

vo kyuuñ mere liye khīñche hue talvār baiThe haiñ

sahārā jab diyā hai kuchh umīd-e-vasl ne aa kar

to uTh kar bistar-e-ġham se tire bīmār baiThe haiñ

hijāb un se vo merā pūchhnā sar rakh ke qadmoñ par

sabab kyā hai jo yuuñ mujh se ḳhafā sarkār baiThe haiñ

wo maqtal mein agar khinche hue talwar baiThe hain

to hum bhi jaan dene ke liye tayyar baiThe hain

dar-e-pir-e-mughan par is tarah mai-KHwar baiThe hain

ki kuchh maKHmur baiThe hain to kuchh sarshaar baiThe hain

agar wo galiyan dene par aamada hain KHalwat mein

to hum bhi arz-e-matlab ke liye tayyar baiThe hain

gala main kaT lun KHud ek ishaara ho jo abru ka

wo kyun mere liye khinche hue talwar baiThe hain

sahaara jab diya hai kuchh umid-e-wasl ne aa kar

to uTh kar bistar-e-gham se tere bimar baiThe hain

hijab un se wo mera puchhna sar rakh ke qadmon par

sabab kya hai jo yun mujh se KHafa sarkar baiThe hain