wo mar gaya sada-e-nauha-gar mein kitni der hai

vo mar gayā sadā-e-nauha-gar meñ kitnī der hai

ki sāneha to ho chukā ḳhabar meñ kitnī der hai

hamāre shahr kī rivāyatoñ meñ ek ye bhī thā

duā se qabl pūchhnā asar meñ kitnī der hai

muqābla hai raqs kā bagūlā kab kā aa chukā

magar patā nahīñ abhī bhañvar meñ kitnī der hai

ḳhudā-e-mahr āsmāñ ujaal de ki yuuñ na ho

diye ko pūchhnā paḌe sahar meñ kitnī der hai

hazār kuufa o halab guzar rahe haiñ roz o shab

maiñ jis taraf chalā huuñ us nagar meñ kitnī der hai

ḳhirad kī tez dhuup meñ junūñ kā sā.ebāñ khilā

maiñ biij bo chukā so ab shajar meñ kitnī der hai

abhī hameñ guzārnī hai ek umr-e-muḳhtasar

magar hamārī umr-e-muḳhtasar meñ kitnī der hai

wo mar gaya sada-e-nauha-gar mein kitni der hai

ki saneha to ho chuka KHabar mein kitni der hai

hamare shahr ki riwayaton mein ek ye bhi tha

dua se qabl puchhna asar mein kitni der hai

muqabla hai raqs ka bagula kab ka aa chuka

magar pata nahin abhi bhanwar mein kitni der hai

KHuda-e-mahr aasman ujal de ki yun na ho

diye ko puchhna paDe sahar mein kitni der hai

hazar kufa o halab guzar rahe hain roz o shab

main jis taraf chala hun us nagar mein kitni der hai

KHirad ki tez dhup mein junun ka saeban khila

main bij bo chuka so ab shajar mein kitni der hai

abhi hamein guzarni hai ek umr-e-muKHtasar

magar hamari umr-e-muKHtasar mein kitni der hai