wo maza rakhte hain kuchh taza fasane apne

vo mazā rakhte haiñ kuchh taaza fasāne apne

bhūlte jaate haiñ sab dard purāne apne

kar ke ik baar tirī chashm-e-fusūñ-gar ke supurd

phir na pūchhā kabhī bandoñ ko ḳhudā ne apne

bazm-e-yārāñ meñ vo ab kaif kahāñ hai baaqī

roz jaate haiñ kahīñ jī ko jalāne apne

haal meñ apne kuchh is tarah magan haiñ goyā

ham ne dekhe hī nahīñ agle zamāne apne

ham vahī haiñ ki jahāñ baat kisī ne pūchhī

ḳhush-gumāñ ho ke lage daaġh dikhāne apne

ham-nashīñ dost kī sūrat to kahāñ miltī hai

chain se vo hai jo dushman ko na jaane apne

zikr se us ke sañvārā hai suḳhan ko 'haqqī'

ḳhush-mazā lagte haiñ kānoñ ko tarāne apne

wo maza rakhte hain kuchh taza fasane apne

bhulte jate hain sab dard purane apne

kar ke ek bar teri chashm-e-fusun-gar ke supurd

phir na puchha kabhi bandon ko KHuda ne apne

bazm-e-yaran mein wo ab kaif kahan hai baqi

roz jate hain kahin ji ko jalane apne

haal mein apne kuchh is tarah magan hain goya

hum ne dekhe hi nahin agle zamane apne

hum wahi hain ki jahan baat kisi ne puchhi

KHush-guman ho ke lage dagh dikhane apne

ham-nashin dost ki surat to kahan milti hai

chain se wo hai jo dushman ko na jaane apne

zikr se us ke sanwara hai suKHan ko 'haqqi'

KHush-maza lagte hain kanon ko tarane apne