wo mehrban ho to sahra bhi gulsitan ho jaen

vo mehrbāñ ho to sahrā bhī gulsitāñ ho jaa.eñ

agar ḳhafā ho to barham sitār-gāñ ho jaa.eñ

havā.eñ shauq samundar kī mehrbāñ ho jaa.eñ

talab safīna ho armān bādbāñ ho jaa.eñ

ba-yās-e-dostī itne bhī ab na do ilzām

ki ham ḳhud apnī taraf se bhī bad-gumāñ ho jaa.eñ

qalandaroñ ke liye shahr kyā hai sahrā kyā

ġharaz to Thor Thikānoñ se hai jahāñ ho jaa.eñ

tumhārī yaad kare aise dil meñ ghar apnā

ham apne ghar meñ ba-tadrīj mehmāñ ho jaa.eñ

tirī razā rahī shāmil to is masāfat meñ

sulagte dasht kī dhūpeñ bhī sā.ebāñ ho jaa.eñ

jo ho yaqīn to bas ik charāġh kaafī hai

na ho to laakh mah-o-mehr rā.egāñ ho jaa.eñ

chalo shigāf banā.eñ fasīl-e-vaqt meñ ham

'ajab nahīñ ki baham saare raftagāñ ho jaa.eñ

jo said-e-dām-e-junūñ the vo pā ga.e manzil

asīr-e-dānish-o-bīnish na be-nishāñ ho jaa.eñ

fuzūl Thahre tag-o-tāz-e-umr bhī saarī

hatheliyoñ kī lakīreñ bhī rā.egāñ ho jaa.eñ

vafā kī jins haiñ 'irfān' ham bhī arzāñ haiñ

ḳharīd lo kahīñ aisā na ho garāñ ho jaa.eñ

wo mehrban ho to sahra bhi gulsitan ho jaen

agar KHafa ho to barham sitar-gan ho jaen

hawaen shauq samundar ki mehrban ho jaen

talab safina ho arman baadban ho jaen

ba-yas-e-dosti itne bhi ab na do ilzam

ki hum KHud apni taraf se bhi bad-guman ho jaen

qalandaron ke liye shahr kya hai sahra kya

gharaz to Thor Thikanon se hai jahan ho jaen

tumhaari yaad kare aise dil mein ghar apna

hum apne ghar mein ba-tadrij mehman ho jaen

teri raza rahi shamil to is masafat mein

sulagte dasht ki dhupen bhi saeban ho jaen

jo ho yaqin to bas ek charagh kafi hai

na ho to lakh mah-o-mehr raegan ho jaen

chalo shigaf banaen fasil-e-waqt mein hum

'ajab nahin ki baham sare raftagan ho jaen

jo said-e-dam-e-junun the wo pa gae manzil

asir-e-danish-o-binish na be-nishan ho jaen

fuzul Thahre tag-o-taz-e-umr bhi sari

hatheliyon ki lakiren bhi raegan ho jaen

wafa ki jins hain 'irfan' hum bhi arzan hain

KHarid lo kahin aisa na ho garan ho jaen