wo mere sath chalne par agar tayyar ho jae

vo mere saath chalne par agar tayyār ho jaa.e

bhale manzil kī jānib se mujhe inkār ho jaa.e

mirā fann-e-adākārī numāyāñ ho ke ubhregā

zarā terī kahānī meñ mirā kirdār ho jaa.e

nashāt-angez shāmoñ kā tasalsul is tarah TuuTā

ki gahrī niiñd se yak-dam koī bedār ho jaa.e

agar apnī madhur āvāz meñ naġhma sunā de vo

to rāh-e-mahfil-e-yārāñ zarā hamvār ho jaa.e

agar vo ik nazar dekhe mire jazbe kī sachchā.ī

nasīhat chhoḌ kar nāseh mirā ġham-ḳhvār ho jaa.e

tirī āñkheñ batātī haiñ tujhe mujh se mohabbat hai

magar dil kī tasallī ko zarā iz.hār ho jaa.e

samajh lo tīrgī derīna sāthī ho ga.ī 'ādil'

charāġh-e-jāñ jalānā jab tumheñ dushvār ho jaa.e

wo mere sath chalne par agar tayyar ho jae

bhale manzil ki jaanib se mujhe inkar ho jae

mera fann-e-adakari numayan ho ke ubhrega

zara teri kahani mein mera kirdar ho jae

nashat-angez shamon ka tasalsul is tarah TuTa

ki gahri nind se yak-dam koi bedar ho jae

agar apni madhur aawaz mein naghma suna de wo

to rah-e-mahfil-e-yaran zara hamwar ho jae

agar wo ek nazar dekhe mere jazbe ki sachchai

nasihat chhoD kar naseh mera gham-KHwar ho jae

teri aankhen batati hain tujhe mujh se mohabbat hai

magar dil ki tasalli ko zara izhaar ho jae

samajh lo tirgi derina sathi ho gai 'adil'

charagh-e-jaan jalana jab tumhein dushwar ho jae