wo meri chin-e-jabin se gham-e-pinhan samjha

vo mirī chīn-e-jabīñ se ġham-e-pinhāñ samjhā

rāz-e-maktūb ba-be-rabti-e-unvāñ samjhā

yak alif besh nahīñ saiqal-e-ā.īna hanūz

chaak kartā huuñ maiñ jab se ki garebāñ samjhā

sharh-e-asbāb-e-giriftārī-e-ḳhātir mat pūchh

is qadar tañg huā dil ki maiñ zindāñ samjhā

bad-gumānī ne na chāhā use sargarm-e-ḳhirām

ruḳh pe har qatra araq dīda-e-hairāñ samjhā

ijz se apne ye jaanā ki vo bad-ḳhū hogā

nabz-e-ḳhas se tapish-e-shola-e-sozāñ samjhā

safar-e-ishq meñ kī zo.af ne rāhat-talabī

har qadam saa.e ko maiñ apne shabistāñ samjhā

thā gurezāñ mizha-e-yār se dil tā dam-e-marg

daf-e-paikān-e-qazā is qadar āsāñ samjhā

dil diyā jaan ke kyuuñ us ko vafādār 'asad'

ġhalatī kī ki jo kāfir ko musalmāñ samjhā

ham ne vahshat-kada-e-bazm-e-jahāñ meñ juuñ sham.a

sho.ala-e-ishq ko apnā sar-o-sāmāñ samjhā

wo meri chin-e-jabin se gham-e-pinhan samjha

raaz-e-maktub ba-be-rabti-e-unwan samjha

yak alif besh nahin saiqal-e-aina hanuz

chaak karta hun main jab se ki gareban samjha

sharh-e-asbab-e-giriftari-e-KHatir mat puchh

is qadar tang hua dil ki main zindan samjha

bad-gumani ne na chaha use sargarm-e-KHiram

ruKH pe har qatra araq dida-e-hairan samjha

ijz se apne ye jaana ki wo bad-KHu hoga

nabz-e-KHas se tapish-e-shola-e-sozan samjha

safar-e-ishq mein ki zoaf ne rahat-talabi

har qadam sae ko main apne shabistan samjha

tha gurezan mizha-e-yar se dil ta dam-e-marg

daf-e-paikan-e-qaza is qadar aasan samjha

dil diya jaan ke kyun us ko wafadar 'asad'

ghalati ki ki jo kafir ko musalman samjha

hum ne wahshat-kada-e-bazm-e-jahan mein jun shama

shoala-e-ishq ko apna sar-o-saman samjha