wo mohabbat wo dil wo KHu hi nahin

vo mohabbat vo dil vo ḳhū hī nahīñ

vāqi.a hai ki tū vo tū hī nahīñ

kab vo īfā-e-ahd karte haiñ

jab yahāñ dil meñ aarzū hī nahīñ

iltifāt-e-sitam-numā hai ye

aaj vo tarz-e-guftugū hī nahīñ

haa.e kyā din the vo masarrat ke

jab ye kahte the aarzū hī nahīñ

zarra zarra hai partav-e-lam.āt

chashm-e-jalva-shanās tū hī nahīñ

kab vo aa.e haiñ pūchhne ahvāl

jab yahāñ tāb-e-guftugū hī nahīñ

aañkh meñ phir kahāñ se aatā hai

jab kahīñ jism meñ lahū hī nahīñ

ḳhvāhish-e-vasl ḳhām-kārī hai

dil se nikle vo aarzū hī nahīñ

ġhaflat-e-jur.at-āzmā be-sūd

ki yahāñ pā-e-justujū hī nahīñ

sang-e-dar bhī rahā hai sarf-e-jabīñ

shāhid-e-sajda ḳhāk-e-kū hī nahīñ

sar na kaT kar gire to sajda kyā

ḳhuun se jo na ho vuzū hī nahīñ

un kā milnā 'munīr' āsāñ hai

sach to ye hai ki justujū hī nahīñ

wo mohabbat wo dil wo KHu hi nahin

waqia hai ki tu wo tu hi nahin

kab wo ifa-e-ahd karte hain

jab yahan dil mein aarzu hi nahin

iltifat-e-sitam-numa hai ye

aaj wo tarz-e-guftugu hi nahin

hae kya din the wo masarrat ke

jab ye kahte the aarzu hi nahin

zarra zarra hai partaw-e-lamat

chashm-e-jalwa-shanas tu hi nahin

kab wo aae hain puchhne ahwal

jab yahan tab-e-guftugu hi nahin

aankh mein phir kahan se aata hai

jab kahin jism mein lahu hi nahin

KHwahish-e-wasl KHam-kari hai

dil se nikle wo aarzu hi nahin

ghaflat-e-jurat-azma be-sud

ki yahan pa-e-justuju hi nahin

sang-e-dar bhi raha hai sarf-e-jabin

shahid-e-sajda KHak-e-ku hi nahin

sar na kaT kar gire to sajda kya

KHun se jo na ho wuzu hi nahin

un ka milna 'munir' aasan hai

sach to ye hai ki justuju hi nahin