wo qad-awar meri unchai se baDh kar na hua

vo qad-āvar mirī ūñchā.ī se baḌh kar na huā

mere jhukne pe bhī vo mere barābar na huā

apnī dastār kā saudā nahīñ hogā mujh se

vaqt ke qadmoñ pe ḳham merā kabhī sar na huā

apnī āñkhoñ se pilā kar mujhe sairāb karo

pyaas itnī hai ki do ghūñT samundar na huā

maiñ to is bojh ko siine se alag kar dūñgā

dil kā kyā kaam agar ye tirā ḳhūgar na huā

terī dāvat mire ā.īne ko dhuñdlā degī

jo jhuke shaah ke dar pe vo qalandar na huā

hai mire paas mirī ḳhāk-nashīnī kā javāz

maiñ tire nain ke mansab pe muqarrar na huā

mere tevar hī ai 'maqsūd' bachat hai merī

saḳht mushkil meñ bhī nīlām ye zevar na huā

wo qad-awar meri unchai se baDh kar na hua

mere jhukne pe bhi wo mere barabar na hua

apni dastar ka sauda nahin hoga mujh se

waqt ke qadmon pe KHam mera kabhi sar na hua

apni aankhon se pila kar mujhe sairab karo

pyas itni hai ki do ghunT samundar na hua

main to is bojh ko sine se alag kar dunga

dil ka kya kaam agar ye tera KHugar na hua

teri dawat mere aaine ko dhundla degi

jo jhuke shah ke dar pe wo qalandar na hua

hai mere pas meri KHak-nashini ka jawaz

main tere nain ke mansab pe muqarrar na hua

mere tewar hi ai 'maqsud' bachat hai meri

saKHt mushkil mein bhi nilam ye zewar na hua