wo rang ishq mein parwardigar aa jae

vo rang ishq meñ parvardigār aa jaa.e

dikhā duuñ aag ko dāman bahār aa jaa.e

ilāhī ḳhair ye aalam siyāh-baḳhtī kā

sukūn māñgiye aur zulf-e-yār aa jaa.e

hayāt-o-maut ko tum jaano ham tumheñ jāneñ

hamāre dīda-o-dil ko qarār aa jaa.e

jo poñchh lo mire aañsū tum apne dāman meñ

to phuul khil ke raheñ aur bahār aa jaa.e

kalīm hausla-e-dīd phir ba-īñ takrār

kahīñ na jal ke koī sho.ala-bār aa jaa.e

tum aao bazm meñ ruḳhsat karo chale jaao

lahad meñ yuuñ mujhe shāyad qarār aa jaa.e

nazar bachā ke mirī aao aate hī hañs do

bahār hī nahīñ lutf-e-bahār aa jaa.e

idhar se nāma-e-a.amāl maiñ chalūñ le kar

udhar se rahmat-e-parvardigār aa jaa.e

na maiñ rahā to banā.egā baat kyā qāsid

agar vo kar ke tirā e.atibār aa jaa.e

chhupāyā gor meñ muñh roz-e-hashr ke Dar se

yahāñ na gardish-e-lail-o-nahār aa jaa.e

mirī bahār hai pinhāñ tumhāre dāman meñ

tum hī na aao to kyūñkar bahār aa jaa.e

fareb-e-husn bhī hai kis qadar hasīn 'qadīr'

ki is ke bhes meñ ik sho.ala-bār aa jaa.e

wo rang ishq mein parwardigar aa jae

dikha dun aag ko daman bahaar aa jae

ilahi KHair ye aalam siyah-baKHti ka

sukun mangiye aur zulf-e-yar aa jae

hayat-o-maut ko tum jaano hum tumhein jaanen

hamare dida-o-dil ko qarar aa jae

jo ponchh lo mere aansu tum apne daman mein

to phul khil ke rahen aur bahaar aa jae

kalim hausla-e-did phir ba-in takrar

kahin na jal ke koi shoala-bar aa jae

tum aao bazm mein ruKHsat karo chale jao

lahad mein yun mujhe shayad qarar aa jae

nazar bacha ke meri aao aate hi hans do

bahaar hi nahin lutf-e-bahaar aa jae

idhar se nama-e-amal main chalun le kar

udhar se rahmat-e-parwardigar aa jae

na main raha to banaega baat kya qasid

agar wo kar ke tera eatibar aa jae

chhupaya gor mein munh roz-e-hashr ke Dar se

yahan na gardish-e-lail-o-nahaar aa jae

meri bahaar hai pinhan tumhaare daman mein

tum hi na aao to kyunkar bahaar aa jae

fareb-e-husn bhi hai kis qadar hasin 'qadir'

ki is ke bhes mein ek shoala-bar aa jae