wo roz-o-shab bhi nahin hain wo rang-o-bu bhi nahin

vo roz-o-shab bhī nahīñ haiñ vo rañg-o-bū bhī nahīñ

vo bazm-e-jām-o-subū bhī nahīñ vo tū bhī nahīñ

na dil dhaḌakte haiñ mil kar na āñkheñ jhuktī haiñ

lahū kī gardisheñ ab misl-e-ābjū bhī nahīñ

kabhī kabhī kī mulāqāt thī sau vo bhī ga.ī

tirī nigāh kā rañg-e-bahāna-jū bhī nahīñ

kab āftāb Dhale aur chāñdnī chhiTke

kisī ko ab ye sar-e-shām justujū bhī nahīñ

bas ab to yaad se hī zindagī ibārat hai

kahāñ kā va.ada ki milne kī aarzū bhī nahīñ

ki jaise bhīge paroñ se uḌāneñ chhin jaa.eñ

diloñ kī sozish-e-be-nām kū-ba-kū bhī nahīñ

vo jis kī garmī qayāmat uThā rahī thī kabhī

usī badan ko jo kaaTo to ab lahū bhī nahīñ

lagī hai tiis baras se hamāre ḳhuuñ kī jhaḌī

magar abhī shajar-e-dār surḳh-rū bhī nahīñ

maiñ sochtā huuñ ji.eñ bhī to kis liye 'fāriġh'

ki ab to shahr meñ pahlī sī aabrū bhī nahīñ

wo roz-o-shab bhi nahin hain wo rang-o-bu bhi nahin

wo bazm-e-jam-o-subu bhi nahin wo tu bhi nahin

na dil dhaDakte hain mil kar na aankhen jhukti hain

lahu ki gardishen ab misl-e-abju bhi nahin

kabhi kabhi ki mulaqat thi sau wo bhi gai

teri nigah ka rang-e-bahana-ju bhi nahin

kab aaftab Dhale aur chandni chhiTke

kisi ko ab ye sar-e-sham justuju bhi nahin

bas ab to yaad se hi zindagi ibarat hai

kahan ka wada ki milne ki aarzu bhi nahin

ki jaise bhige paron se uDanen chhin jaen

dilon ki sozish-e-be-nam ku-ba-ku bhi nahin

wo jis ki garmi qayamat uTha rahi thi kabhi

usi badan ko jo kaTo to ab lahu bhi nahin

lagi hai tis baras se hamare KHun ki jhaDi

magar abhi shajar-e-dar surKH-ru bhi nahin

main sochta hun jien bhi to kis liye 'farigh'

ki ab to shahr mein pahli si aabru bhi nahin