wo ruh ban ke meri fikr aur shuur mein hai

vo ruuh ban ke mirī fikr aur shu.ūr meñ hai

vo ek dard hai jo qalb-e-nā-subūr meñ hai

ye kā.enāt hai husn-e-azal kā aks-e-jamīl

shafaq ke rang meñ hai vo sahar ke nuur meñ hai

vo zahr-e-ġham ko bhī ik jām-e-angabīñ samjhā

vo bāda-kash jo ma-e-ishq ke surūr meñ hai

usī kā jalva hai dekho to dīda-e-dil se

nazar se chhup ke bhī vo ālam-e-zuhūr meñ hai

niyāz-e-ishq kahāñ shaiḳh kī ibādat meñ

ḳhayāl-e-yār meñ ham vo ḳhayāl-e-hūr meñ hai

wo ruh ban ke meri fikr aur shuur mein hai

wo ek dard hai jo qalb-e-na-subur mein hai

ye kaenat hai husn-e-azal ka aks-e-jamil

shafaq ke rang mein hai wo sahar ke nur mein hai

wo zahr-e-gham ko bhi ek jam-e-angabin samjha

wo baada-kash jo ma-e-ishq ke surur mein hai

usi ka jalwa hai dekho to dida-e-dil se

nazar se chhup ke bhi wo aalam-e-zuhur mein hai

niyaz-e-ishq kahan shaiKH ki ibaadat mein

KHayal-e-yar mein hum wo KHayal-e-hur mein hai