wo saat surat-e-chaqmaq jis se lau nikalti hai

vo sā'at sūrat-e-chaqmāq jis se lau nikaltī hai

talāsh-e-ādmī ke zāviye kyā kyā badaltī hai

kabhī ik lau se shashdar hai kabhī ik zau se hairāñ hai

zamīñ kis inkishāf-e-nār se yārab pighaltī hai

taġhayyur kī sadī hai ātishīñ ḳhvāboñ kī paikāreñ

rasad-gāhoñ ke ā.īnoñ meñ ik tā'bīr Dhaltī hai

nazar ko ik ufuq tāza-e-ruḳhī se terī miltā hai

vafā us fāsle kā raaz pā kar ḳhud sañbhaltī hai

nigāh-e-nāz sab ramz-e-mohabbat kah ga.ī āḳhir

ḳhirad kī parda-dārī kyā kaf-e-afsos maltī hai

lahū meñ aap jal uThtī hai koī sham-e-ḳhalvat sī

visāl-andāz us ke ḳhvāb meñ jab raat Dhaltī hai

rivāyat kī qanāteñ jis havā se jalne vaalī haiñ

savād-e-asia meñ vo havā ab tez chaltī hai

varaq ik dhund kā taaza taġhayyur jab ulaTtā hai

tarāshīda ruḳh-e-almās sī ik lau nikaltī hai

wo sa'at surat-e-chaqmaq jis se lau nikalti hai

talash-e-admi ke zawiye kya kya badalti hai

kabhi ek lau se shashdar hai kabhi ek zau se hairan hai

zamin kis inkishaf-e-nar se yarab pighalti hai

taghayyur ki sadi hai aatishin KHwabon ki paikaren

rasad-gahon ke aainon mein ek ta'bir Dhalti hai

nazar ko ek ufuq taza-e-ruKHi se teri milta hai

wafa us fasle ka raaz pa kar KHud sanbhalti hai

nigah-e-naz sab ramz-e-mohabbat kah gai aaKHir

KHirad ki parda-dari kya kaf-e-afsos malti hai

lahu mein aap jal uThti hai koi sham-e-KHalwat si

visal-andaz us ke KHwab mein jab raat Dhalti hai

riwayat ki qanaten jis hawa se jalne wali hain

sawad-e-asia mein wo hawa ab tez chalti hai

waraq ek dhund ka taza taghayyur jab ulaTta hai

tarashida ruKH-e-almas si ek lau nikalti hai