wo sanwar sakta hai maqul bhi ho sakta hai

vo sañvar saktā hai ma.aqūl bhī ho saktā hai

merā andāza mirī bhuul bhī ho saktā hai

ab pas-e-abr hai jab abr se bāhar niklā

vo chamak saktā hai maqbūl bhī ho saktā hai

duur se dekhā hai nazdīk se bhī dekhūñgā

phuul sā lagtā hai jo phuul bhī ho saktā hai

aaj kī shab bhī sitāroñ ne agar saath diyā

dil jo be-kār hai mashġhūl bhī ho saktā hai

kyuuñ samajhtā huuñ ki aatā hai vo merī ḳhātir

sair us shaḳhs kā ma.amūl bhī ho saktā hai

taḳht tabdīl bhī ho saktā hai taḳhte meñ kabhī

apne ohde se vo māzūl bhī ho saktā hai

jāntā kaun thā 'ḳhāvar' vo daraḳhshāñ taarā

gir ke āñkhoñ se kabhī dhuul bhī ho saktā hai

wo sanwar sakta hai maqul bhi ho sakta hai

mera andaza meri bhul bhi ho sakta hai

ab pas-e-abr hai jab abr se bahar nikla

wo chamak sakta hai maqbul bhi ho sakta hai

dur se dekha hai nazdik se bhi dekhunga

phul sa lagta hai jo phul bhi ho sakta hai

aaj ki shab bhi sitaron ne agar sath diya

dil jo be-kar hai mashghul bhi ho sakta hai

kyun samajhta hun ki aata hai wo meri KHatir

sair us shaKHs ka mamul bhi ho sakta hai

taKHt tabdil bhi ho sakta hai taKHte mein kabhi

apne ohde se wo mazul bhi ho sakta hai

jaanta kaun tha 'KHawar' wo daraKHshan tara

gir ke aankhon se kabhi dhul bhi ho sakta hai