wo sar se panw tak hai ghazab se bhara hua

vo sar se paañv tak hai ġhazab se bharā huā

maiñ bhī huuñ aaj josh-e-talab se bharā huā

shorish mire dimāġh meñ bhī koī kam nahīñ

ye shahr bhī hai shor-o-shaġhab se bharā huā

haañ ai havā-e-hijr hameñ kuchh ḳhabar nahīñ

ye shīsha-e-nashāt hai jab se bharā huā

miltā hai aadmī hī mujhe har maqām par

aur maiñ huuñ aadmī kī talab se bharā huā

Takrāo jā ke sub.h ke sāġhar se 'āftāb'

dil kā ye jaam va.ada-e-shab se bharā huā

wo sar se panw tak hai ghazab se bhara hua

main bhi hun aaj josh-e-talab se bhara hua

shorish mere dimagh mein bhi koi kam nahin

ye shahr bhi hai shor-o-shaghab se bhara hua

han ai hawa-e-hijr hamein kuchh KHabar nahin

ye shisha-e-nashat hai jab se bhara hua

milta hai aadmi hi mujhe har maqam par

aur main hun aadmi ki talab se bhara hua

Takrao ja ke subh ke saghar se 'aftab'

dil ka ye jam wada-e-shab se bhara hua