wo shakl wo shanaKHt wo paikar ki aarzu

vo shakl vo shanāḳht vo paikar kī aarzū

patthar kī ho ke rah ga.ī patthar kī aarzū

chhat ho falak to ḳhaak uḌāne ko paañv meñ

sahrā meñ khīñchtī hai hameñ ghar kī aarzū

zaḳhmī kiye haiñ paañv kabhī laa.ī raah par

kab kaun jaan paayā hai Thokar kī aarzū

apnī giraft meñ liye uḌtā phire kahīñ

parvāz ko hai kab se usī par kī aarzū

rahtī hai mujh meñ kab se kuñvārī hai aaj tak

ik aarzū ke apne svayambar kī aarzū

'akhilesh' kab bujhī hai havas kī shadīd pyaas

dariyā tamām pī le samundar kī aarzū

wo shakl wo shanaKHt wo paikar ki aarzu

patthar ki ho ke rah gai patthar ki aarzu

chhat ho falak to KHak uDane ko panw mein

sahra mein khinchti hai hamein ghar ki aarzu

zaKHmi kiye hain panw kabhi lai rah par

kab kaun jaan paya hai Thokar ki aarzu

apni giraft mein liye uDta phire kahin

parwaz ko hai kab se usi par ki aarzu

rahti hai mujh mein kab se kunwari hai aaj tak

ek aarzu ke apne swayambar ki aarzu

'akhilesh' kab bujhi hai hawas ki shadid pyas

dariya tamam pi le samundar ki aarzu