wo suraj itna nazdik aa raha hai

vo sūraj itnā nazdīk aa rahā hai

mirī hastī kā saaya jā rahā hai

ḳhudā kā aasrā tum de ga.e the

ḳhudā hī aaj tak kaam aa rahā hai

bikharnā aur phir un gesuoñ kā

do-ālam par añdherā chhā rahā hai

javānī aa.ina le kar khaḌī hai

bahāroñ ko pasīna aa rahā hai

kuchh aise aa.ī hai bād-e-muāfiq

kinārā duur haTtā jā rahā hai

ġham-e-fardā kā istiqbāl karne

ḳhayāl-e-ahd-e-māzī aa rahā hai

vo itne be-muravvat to nahīñ the

koī qasdan unheñ bahkā rahā hai

kuchh is pākīzgī se kī hai tauba

ḳhayāloñ par nasha sā chhā rahā hai

zarūrat hai ki baḌhtī jā rahī hai

zamāna hai ki ghaTtā jā rahā hai

hujūm-e-tishnagī kī raushnī meñ

zamīr-e-mai-kada tharrā rahā hai

ḳhudā mahfūz rakkhe kashtiyoñ ko

baḌī shiddat kā tūfāñ aa rahā hai

koī pichhle pahar dariyā-kināre

sitāroñ kī dhunoñ par gā rahā hai

zarā āvāz denā zindagī ko

'adam' irshād kuchh farmā rahā hai

wo suraj itna nazdik aa raha hai

meri hasti ka saya ja raha hai

KHuda ka aasra tum de gae the

KHuda hi aaj tak kaam aa raha hai

bikharna aur phir un gesuon ka

do-alam par andhera chha raha hai

jawani aaina le kar khaDi hai

bahaaron ko pasina aa raha hai

kuchh aise aai hai baad-e-muafiq

kinara dur haTta ja raha hai

gham-e-farda ka istiqbaal karne

KHayal-e-ahd-e-mazi aa raha hai

wo itne be-murawwat to nahin the

koi qasdan unhen bahka raha hai

kuchh is pakizgi se ki hai tauba

KHayalon par nasha sa chha raha hai

zarurat hai ki baDhti ja rahi hai

zamana hai ki ghaTta ja raha hai

hujum-e-tishnagi ki raushni mein

zamir-e-mai-kada tharra raha hai

KHuda mahfuz rakkhe kashtiyon ko

baDi shiddat ka tufan aa raha hai

koi pichhle pahar dariya-kinare

sitaron ki dhunon par ga raha hai

zara aawaz dena zindagi ko

'adam' irshad kuchh farma raha hai