wo taghaful ko ilaj-e-gham-e-pinhan samjha

vo taġhāful ko ilāj-e-ġham-e-pinhāñ samjhā

chāra-gar bhī na mire dard kā darmāñ samjhā

tāb-e-dīdār na laa.ī nigah-e-nāz-parast

aur vo dīda-e-ushshāq pe ehsāñ samjhā

jam.a ḳhātir na huī dīd-e-butāñ se apnī

daftar-e-husn ko ajzā-e-pareshāñ samjhā

na huī jalva-gah-e-nāz kī vus.at ma.alūm

go maiñ har zarra ko ik dīda-e-hairāñ samjhā

thī tirī yaad bhī kyā anjuman-ārā-e-ḳhayāl

dil meñ jo sho.ala uThā sham-e-shabistāñ samjhā

shorish-e-ishq kā āsān na thā andāza

chaak ho kar mirī vahshat ko garebāñ samjhā

sāhib-e-dil hai vahī murshid-e-kāmil hai vahī

mere chehre se jo merā ġham-e-pinhāñ samjhā

har nafas shāhid-e-dushvārī-e-ulfat hai 'nazar'

saḳht mushkil thā vahī kaam jo āsāñ samjhā

wo taghaful ko ilaj-e-gham-e-pinhan samjha

chaara-gar bhi na mere dard ka darman samjha

tab-e-didar na lai nigah-e-naz-parast

aur wo dida-e-ushshaq pe ehsan samjha

jama KHatir na hui did-e-butan se apni

daftar-e-husn ko ajza-e-pareshan samjha

na hui jalwa-gah-e-naz ki wusat malum

go main har zarra ko ek dida-e-hairan samjha

thi teri yaad bhi kya anjuman-ara-e-KHayal

dil mein jo shoala uTha sham-e-shabistan samjha

shorish-e-ishq ka aasan na tha andaza

chaak ho kar meri wahshat ko gareban samjha

sahib-e-dil hai wahi murshid-e-kaamil hai wahi

mere chehre se jo mera gham-e-pinhan samjha

har nafas shahid-e-dushwari-e-ulfat hai 'nazar'

saKHt mushkil tha wahi kaam jo aasan samjha