wo teri inayat ki saza yaad hai ab tak

vo terī ināyat kī sazā yaad hai ab tak

aayā thā ḳhudā yaad ḳhudā yaad hai ab tak

chhalkī huī āñkhoñ meñ mai-e-surḳh ke Dore

zulfoñ kī vo lahrā.ī ghaTā yaad hai ab tak

vo jism kī ḳhushbū kī pur-asrār sī lapTeñ

vo mo.ajiza-e-mauj-e-sabā yaad hai ab tak

vo chāñdī ke paanī se dhule āriz-o-ruḳh par

kaifiyyat-e-sad-rañg-e-hinā yaad hai ab tak

thī jis ko ba-har-gām sahāre kī zarūrat

mujh ko vo tirī laġhzish-e-pā yaad hai ab tak

vo bātoñ hī bātoñ meñ bigaḌ jaane ke andāz

vo ruuTh ke manñe kī adā yaad hai ab tak

qurbat kī tamannā ko sameTe hue duurī

vo apnī ḳhudī terī anā yaad hai ab tak

jo sar ba-hama-e-zo.am jhukā thā tire aage

jo dil ki thā rāzī-ba-razā yaad hai ab tak

halke se ishāre pe vo jaañ dene kī ḳhvāhish

vo daur-e-junūñ ahd-e-vafā yaad hai ab tak

kyā tujh ko vafāoñ kī adā yaad rahegī

mujh ko to tirā tarz-e-jafā yaad hai ab tak

ab saḳhtī-e-daurāñ kī kaḌī dhuup hai aur ham

lekin tire kūche kī havā yaad hai ab tak

wo teri inayat ki saza yaad hai ab tak

aaya tha KHuda yaad KHuda yaad hai ab tak

chhalki hui aankhon mein mai-e-surKH ke Dore

zulfon ki wo lahrai ghaTa yaad hai ab tak

wo jism ki KHushbu ki pur-asrar si lapTen

wo moajiza-e-mauj-e-saba yaad hai ab tak

wo chandi ke pani se dhule aariz-o-ruKH par

kaifiyyat-e-sad-rang-e-hina yaad hai ab tak

thi jis ko ba-har-gam sahaare ki zarurat

mujh ko wo teri laghzish-e-pa yaad hai ab tak

wo baaton hi baaton mein bigaD jaane ke andaz

wo ruTh ke manne ki ada yaad hai ab tak

qurbat ki tamanna ko sameTe hue duri

wo apni KHudi teri ana yaad hai ab tak

jo sar ba-hama-e-zoam jhuka tha tere aage

jo dil ki tha raazi-ba-raza yaad hai ab tak

halke se ishaare pe wo jaan dene ki KHwahish

wo daur-e-junun ahd-e-wafa yaad hai ab tak

kya tujh ko wafaon ki ada yaad rahegi

mujh ko to tera tarz-e-jafa yaad hai ab tak

ab saKHti-e-dauran ki kaDi dhup hai aur hum

lekin tere kuche ki hawa yaad hai ab tak