wo tijarat mein kahan koi ziyan chhoDta hai

vo tijārat meñ kahāñ koī ziyāñ chhoḌtā hai

ruuh le letā hai ā'sāb yahāñ chhoḌtā hai

hai ye patthar mirā shīshe se tire bālā-tar

kam se kam zulm ke māthe pe nishāñ chhoḌtā hai

bazm-e-anjum meñ uThā laa.e ho ye kis kā diyā

nuur to kuchh nahīñ detā hai dhuāñ chhoḌtā hai

ham se ḳhud-sar sū-e-maidān-e-viġhā jaate hue

ye nahīñ sochte haiñ kaun kahāñ chhoḌtā hai

'ishq vo mo'jiza-e-kun hai nishāñ jo apne

jahāñ hotī nahīñ ummīd vahāñ chhoḌtā hai

qasr-e-fir'aun idhar aur udhar vādī-e-misr

dekhnā ye hai kidhar āb-e-ravāñ chhoḌtā hai

ai ḳhirad-bāḳhta shaddād iram par tirī tuf

itne saste meñ koī bāġh-e-jināñ chhoḌtā hai

vahshateñ khīñch liye jaatī haiñ sahrā meñ 'safar'

apnī marzī se bhalā kaun makāñ chhoḌtā hai

wo tijarat mein kahan koi ziyan chhoDta hai

ruh le leta hai aa'sab yahan chhoDta hai

hai ye patthar mera shishe se tere baala-tar

kam se kam zulm ke mathe pe nishan chhoDta hai

bazm-e-anjum mein uTha lae ho ye kis ka diya

nur to kuchh nahin deta hai dhuan chhoDta hai

hum se KHud-sar su-e-maidan-e-wigha jate hue

ye nahin sochte hain kaun kahan chhoDta hai

'ishq wo mo'jiza-e-kun hai nishan jo apne

jahan hoti nahin ummid wahan chhoDta hai

qasr-e-fir'aun idhar aur udhar wadi-e-misr

dekhna ye hai kidhar aab-e-rawan chhoDta hai

ai KHirad-baKHta shaddad iram par teri tuf

itne saste mein koi bagh-e-jinan chhoDta hai

wahshaten khinch liye jati hain sahra mein 'safar'

apni marzi se bhala kaun makan chhoDta hai