wo to yunhi kahta hai ki main kuchh nahin kahta

vo to yūñhī kahtā hai ki maiñ kuchh nahīñ kahtā

merā ye maqūla hai ki maiñ kuchh nahīñ kahtā

kah jaatā hai vo saaf hazāroñ mujhe bāteñ

phir us pe ye kahtā hai ki maiñ kuchh nahīñ kahtā

ai dosto us shoḳh kā maiñ kyā kahūñ aalam

kuchh aaj vo dekhā hai ki maiñ kuchh nahīñ kahtā

yuuñ ġhair satā.eñ mujhe aur kuchh na kahūñ maiñ

muñh mujh ko tumhārā hai ki maiñ kuchh nahīñ kahtā

har baat pe kyā kyā hameñ kahtā hai vo zālim

gar kahiye to kahtā hai ki maiñ kuchh nahīñ kahtā

bas aur kiyā chāhte ho mujh pe sitam kyā

socho to ye thoḌā hai ki maiñ kuchh nahīñ kahtā

kyā haal banāyā hai ġham-e-ġhair meñ apnā

vo aap kā naqshā hai ki maiñ kuchh nahīñ kahtā

juz mere kisī aur ko to aap satā.eñ

haañ aap ne samjhā hai ki maiñ kuchh nahīñ kahtā

aisā hameñ kahte ho ki bas jānte haiñ ham

ye aap ko dhokā hai ki maiñ kuchh nahīñ kahtā

kyā kyā mujhe tum kahte ho insāf to kiije

ye hausla merā hai ki maiñ kuchh nahīñ kahtā

da.avā kareñ go aur 'nizām' apne suḳhan par

par mujh ko ye da.avā hai ki maiñ kuchh nahīñ kahtā

wo to yunhi kahta hai ki main kuchh nahin kahta

mera ye maqula hai ki main kuchh nahin kahta

kah jata hai wo saf hazaron mujhe baaten

phir us pe ye kahta hai ki main kuchh nahin kahta

ai dosto us shoKH ka main kya kahun aalam

kuchh aaj wo dekha hai ki main kuchh nahin kahta

yun ghair sataen mujhe aur kuchh na kahun main

munh mujh ko tumhaara hai ki main kuchh nahin kahta

har baat pe kya kya hamein kahta hai wo zalim

gar kahiye to kahta hai ki main kuchh nahin kahta

bas aur kiya chahte ho mujh pe sitam kya

socho to ye thoDa hai ki main kuchh nahin kahta

kya haal banaya hai gham-e-ghair mein apna

wo aap ka naqsha hai ki main kuchh nahin kahta

juz mere kisi aur ko to aap sataen

han aap ne samjha hai ki main kuchh nahin kahta

aisa hamein kahte ho ki bas jaante hain hum

ye aap ko dhoka hai ki main kuchh nahin kahta

kya kya mujhe tum kahte ho insaf to kije

ye hausla mera hai ki main kuchh nahin kahta

dawa karen go aur 'nizam' apne suKHan par

par mujh ko ye dawa hai ki main kuchh nahin kahta