wo un dinon to hamara tha lekin ab kya hai

vo un dinoñ to hamārā thā lekin ab kyā hai

phir us se aaj vahī ranj-e-be-sabab kyā hai

tum us kā vaar bachāne kī fikr meñ kyuuñ ho

vo jāntā hai masīhā.iyoñ kā Dhab kyā hai

dabīz kohar hai yā narm dhuup kī chādar

ḳhabar nahīñ tire baad ai ġhubār-e-shab kyā hai

dikhā rahā hai kise vaqt an-ginat manzar

agar maiñ kuchh bhī nahīñ huuñ to phir ye sab kyā hai

ab is qadar bhī sukūñ mat dikhā bichhaḌte hue

vo phir tujhe na kabhī mil sake ajab kyā hai

maiñ apne chehre se kis tarah ye naqāb uThā.ūñ

samajh bhī jā ki pas-e-parda-e-tarab kyā hai

yahāñ nahīñ hai ye dastūr-e-guftugū 'irfān'

fuġhāñ sune na koī harf-e-zer-e-lab kyā hai

wo un dinon to hamara tha lekin ab kya hai

phir us se aaj wahi ranj-e-be-sabab kya hai

tum us ka war bachane ki fikr mein kyun ho

wo jaanta hai masihaiyon ka Dhab kya hai

dabiz kohar hai ya narm dhup ki chadar

KHabar nahin tere baad ai ghubar-e-shab kya hai

dikha raha hai kise waqt an-ginat manzar

agar main kuchh bhi nahin hun to phir ye sab kya hai

ab is qadar bhi sukun mat dikha bichhaDte hue

wo phir tujhe na kabhi mil sake ajab kya hai

main apne chehre se kis tarah ye naqab uThaun

samajh bhi ja ki pas-e-parda-e-tarab kya hai

yahan nahin hai ye dastur-e-guftugu 'irfan'

fughan sune na koi harf-e-zer-e-lab kya hai